Emma Watson

Rupert Grint í viðtali við THE SUN Blaðamaður: Grant Rollins Viðtal þýtt af RupertGrintNet í maí 2004 Anna Heiða Pálsdóttir þýddi   (Mynd af Rupert með hundinn sinn, Ruby, í garðinum heima hjá sér)

Rupert Grint hefur nú í fyrsta skipti sagt frá því hvernig hann fékk hlutverk Ron Weasley: hann var í pilsi.

Ungi leikarinn elskaði metsölubækur J.K. Rowling og var ákafur að fá hlutverkið.

Til þess að gera eitthvað sérstaklega eftirtektarvert stældi hann einn af kennurum sínum, sem er kona.

Í einkaviðtali við Sun, sínu stærsta til þessa, sagði Rupert: „Ég klæddi mig upp eins og leiklistarkennarinn minn fyrir vídeóupptökuna sem átti að senda inn, og ég rappaði.“

„Þannig vill til að hún er kona svo ég varð að vera í pilsi. Ég veit að Ron er ekki kvenkyns en mig langaði að vekja athygli á mér og sýna að ég gæti ýmislegt.“

Rupert, sem þá var 11 ára, komst að því að senda mátti inn prufuupptökur á vefsíðu BBC fyrir barnaþættina Newsround. Hann þurfti að fara sex sinnum í leikprufur eftir að hann sendi inn myndbandið - og hafði ekki gaman af því.

Rupert segir: „Í leikprufunum verður maður að læra hlutverkið sitt utan að og fara í prufuupptöku. Ég varð að gera þetta sex eða sjö sinnum. Mér fannst það ekkert skemmtilegt því þetta tekur virkilega á taugarnar.“

Rupert er nú 15 ára - en hann hafði bara komið fram í skólaleikritum áður en hann hlaut hlutverk besta vinar Harrys.

Á einni nóttu breyttist hann úr venjulegum skólastrák í kvikmyndastjörnu. Hann er smám saman að venjast frægðinni - og athygli stelpnanna úr aðdáendahópnum.

„Ég fæ fullt af aðdáendabréfum frá stelpum og sumar stelpur koma og tala við mig úti á götu.“

Rauðhærða stjarnan er ekki hrifinn af rómantískum hlutverkum. En í kvikmyndinni er Ron hægt og hægt að falla fyrir Hermione vinkonu sinni, þannig að Rupert verður að fást við nokkur „klaufaleg“ atriði.

Hann lætur uppi að búið sé að taka upp nokkrar senur þar sem þau skötuhjúin faðmi hvort annað og haldist í hendur - sem sýnir að nýi leikstjórinn Alfonso Cuaron hafi kryddað handritið svolítið.

Rupert segir: „Sumar senur voru svo vandræðalegar. Ég þurfti að halda í höndina á Hermione. Við föðmuðumst líka en það var klippt út.“

Í bókunum haldast Ron og Hermione ekki í hendur fyrr en í þeirri fjórðu, Eldbikarnum.

Rupert segir: „Það er skrýtið að leika ástarsenu. Ég hef aldrei verið hrifinn af því að leika rómantíska manneskju.“

Honum finnst mun meira heillandi að leika í gamanmyndum. Og Ron segir ýmsa fyndna hluti sem Rupert tekst vel að koma til skila. Hann segir: „Ég er ekki alvarlega týpan. Ron er fyndinn náungi og þess vegna er ég svo hrifinn af því að leika hann.“

„Ég hef alltaf verið hrifinn af gamanmyndum. Ég held mikið upp á Lee Evans. Hann er „kúl“. Ég myndi gjarnan vilja leika í einhverri gamanmynd þegar Harry Potter-myndirnar eru búnar.“

Gríninu er ekki lokið þegar slökkt er á myndatökuvélunum. Rupert og Daniel Radcliffe, sem leikur Harry, eru orðnir miklir vinir og hafa gaman af fíflalátum.

Rupert teiknar líka grínmyndir af vinum og meðleikurum.

Hann segir: „Ég teikna grínmyndir. Ég teiknaði Alan Rickman (prófessor Snape) með risastórt nef. Ég ætlaði ekki að leyfa honum að sjá myndina en hann læddist aftan að mér og sá hana. Hann spurði hvort hann mætti eiga hana, og ég var dauðfeginn. Þetta var eins og þegar kennari grípur mann gera eitthvað sem er bannað. Ég var dauðhræddur.“

Rupert, sem verður 16 ára í ágúst, hefur ekki gaman af skólanum. Hann viðurkennir að hann „gleymi“ oft að læra heima og vill gjarnan hætta í skóla eftir samræmdu prófin í júní 2004.

Hann segir: „Það er enn verið að skamma mig. Ég var látinn sitja eftir þegar ég kom aftur í skólann eftir myndatökurnar vegna þess að ég lærði ekki heima.“

„Þegar leikstjórinn gaf okkur verkefni til að hjálpa okkur að komast inn í hlutverkin átti ég að lýsa Ron en ég gleymdi því alveg. En Alfonso fannst þetta svo líkt Ron, þannig að hann varð ekki vondur.“

Rupert er enn ekki búinn að ljúka lestrinum á fimmtu bókinni um Harry Potter, Fönixreglunni, sem kom út sl. sumar. Hann viðurkennir: „Ég er byrjaður á henni og hún virðist stórfín.“

Ef til vill er félagslífið að taka of mikið af tíma hans.

Hann segir: „Ég er byrjaður í golfi. Ég elska líka að keyra go-kart bíla.“ Ungi leikarinn hefur notað launin fyrir þessar þrjár myndir til að leyfa sér ýmislegt.

„Ég keypti mér go-kart bíl og golfsett. Ég kaupi mér hluti sem ég hef gaman af. Svo er eitthvað af peningunum geymt í lokuðum sjóð í banka.“

En Rupert finnst ekkert skemmtilegra en að vera á tökustað. Hann talar af miklum ákafa um áhættuatriði fyrir nýju myndina. „Það er gaur í samfestingi sem dregur mig eftir grasinu. Í myndinni er hann tekinn út og tölvugerður hundur settur í staðinn.“

„Mér fannst svo gaman að leika í þessari mynd. Hún er æðisleg.“

Rupert býr hjá foreldrum sínum, Jo og Nigel, ásamt fjórum yngri systkinum og hundinum Ruby í Hertfordshire á Englandi. Hann segir: „Ég þarf ennþá að taka sjálfur til í herberginu mínu. Ég er að reyna að lifa venjulegu lífi eins og hægt er. Ég kem úr stórri fjölskyldu og það hjálpar manni að halda í raunveruleikann.“

Yngsta systir hans, Charlotte, hélt að hann hefði galdramátt þegar hún var lítil. Rupert segir: „Charlotte var þriggja ára þegar myndin um Viskusteininn var frumsýnd og hún hélt að þetta væri raunverulegt. Þegar ég datt af hestbaki var hún rosalega áhyggjufull. Sem betur fer hefur hún ekki beðið mig um að gera nein töfraatriði.“

Þýðing: Anna Heiða Pálsdóttir, © 2004.