Emma Watson

Rupert Grint skemmtir sér við gerð þriðju myndarinnar Blaðamaður: Marie Morreale Viðtal þýtt af Scholastic í júní 2004     (Mynd af Warner Bros)

Rupert Grint hefur varið síðustu árunum í það að leika Ron Weasley, besta vin Harry Potter. Hann er kominn aftur, og í þetta skiptið fær hann ekki aðeins að eyða tímanum með Harry og Hermione, heldur fær hann líka að vera með uglunum.

Við settumst smástund til að spjalla við Rupert um upptökurnar á Fanganum frá Azkaban og uppáhalds tegund hans af uglum.

Komist að því hvaða uglur hann heldur mest upp á með því að lesa þetta viðtal við ritstjórann Marie Morreale.

Marie: Ég ætla að spyrja þig nokkurra spurninga um uglurnar í myndinni. Áttu þér einhverja uppáhaldstegund af uglum?

Rupert: Uppáhaldstegund af uglum? Ég er ferlega hrifinn af snæuglum eins og þeim sem notaðar eru í myndinni. Sú sem þeir notuðu er æðisleg.

Marie: Af hverju ertu svona hrifinn af henni?

Rupert: Ég veit það ekki. Hún er bara rosalega „kúl“. Hin uglan sem ég var svo hrifin af var sú sem var Errol. Ég er ekki alveg viss um hvers konar ugla það var, en hún var frábær.

Marie: Þurftirðu að eiga mikil samskipti við uglurnar?

Rupert: Ó, já, þær voru rosalega vel tamdar. Það var hægt að láta þær gera hvað sem er.

Marie: Finnst þér einhver sérstök ástæða fyrir því að uglur henti vel sem miðill fyrir galdrana í Harry Potter?

Rupert: Ég er ekki viss, satt að segja. Þær eru hrikalega hlýðnar og þær flytja skilaboð eins og ekkert sé, svo það hlýtur að vera ástæðan.

Marie: Gerðist einhvern tíma eitthvað í sambandi við uglurnar sem er þér sérstaklega minnisstætt?

Rupert: Það var sérstaklega í eitt skipti þegar við vorum í bílnum með tvíburunum, Fred og George. Ég man ekki nákvæmlega hvað gerðist, en uglan dritaði á Fred, annan tvíburanna, og það var ógeðsleg fýla aftur í bílnum vegna þess að þetta var pínulítill bíll og það var svo heitt innan í honum. Skítafýlan var óhugnanleg.

Marie: Þetta hljómar ekki heillandi á nokkurn hátt. Hvað var annars skemmtilegast við þessa mynd?

Rupert: Ég var með rosalega gott áhættuhlutverk í þessari mynd. Það var svoleiðis að ... ég var dreginn áfram. Mennirnir settu einhvers konar beisli eða band á fótlegginn á mér. Þá dró hundurinn mig inn í tré. Mér fannst það æðislega skemmtilegt.

Marie: Hvað varstu lengi í þeirri upptöku?

Rupert: Ég var allur út í púðum. Þetta tók ekki langan tíma vegna þess að allt þurfti að gerast svo hratt, það var allt í lagi.

Marie: Meiddistu nokkuð? Fékkstu marbletti?

Rupert: Ég gleypti fullt af grasi. Nei, ég meiddist ekkert. Þetta var stórfínt.

Marie: Ertu með aðrar myndir í huga eftir að næsta Harry Potter mynd er búin?

Rupert: Ég held að ég spili bara eftir eyranu. Mér fannst æðislega gaman að leika í þessum myndum, svo ég bíð bara.

Marie: Þetta er spurning sem kemur frá einu af tímaritum okkar sem kemur út á Englandi. Mér var sagt að þú værir að læra undir samræmd próf?

Rupert: Æ, já, ég er að undirbúa mig fyrir samræmdu prófin (sem kallast GCSE á Englandi) og tek þau næsta ár.

Marie: Hvað þarftu að gera til að undirbúa þig?

Rupert: Bara svona upprifjun. Maður velur sér fög og tekur bara próf í þeim fögum sem maður hefur valið og svo auðvitað líka skyldubundin próf eins og stærðfræði og líffræði og svoleiðis sem mér finnst ekkert rosalega skemmtilegt.

Marie: Hvaða fög hefurðu valið þér?

Rupert: Ég valdi hugvísindi, þýsku, vegna þess að maður verður að velja eitt tungumál, annað hvort frönsku eða þýsku eða spænsku. Þýskan var tiltölulega létt svo ég valdi hana.

Marie: Hvað ertu búinn að læra þýsku lengi?

Rupert: Í svona þrjú ár.

Marie: Finnst þér til dæmis að þegar þú ferð til Þýskalands, getirðu tjáð þig sæmilega?

Rupert: Blessuð góða, langt frá því. Ég er að reyna að tengja saman setningar og svo kann ég að telja nokkurn veginn.

Marie: Er erfitt að takast á við námið og leika líka á fullu í kvikmyndunum?

Rupert: Nei, þetta tekst ágætlega. Við erum með einkakennara í stúdíóinu og lærum hjá honum a.m.k. í þrjá tíma á dag þegar upptökur standa yfir, og fimm tima þegar engar tökur eru. Þetta er ágætt svona, að fá einkakennslu. Maður missir ekki af hlutum, eins og oft gerist hjá vinum mínum. Í venjulegum skóla er svo margt sem truflar mann frá náminu, en þetta er einkakennsla, svo maður getur ekki látið neitt trufla sig.

Marie: Á hvaða stað myndirðu helst fara í frí?

Rupert: Eiginlega er ég hrifnastur af sólríkum stöðum. Mér finnst þeir æðislegir. Eitt árið fór ég til Sviss og það var geggjað. Æðislegt.

Marie: Fórstu á skíði?

Rupert: Nei, það snjóaði ekkert, svo okkur gafst ekki tækifæri til þess. Það virðist samt skemmtilegt að fara á skíði. Ég hef aldrei prófað það sjálfur en það hlýtur að vera gaman.

Marie: Hver er mesta breytingin í lífi þínu síðan þú byrjaðir að leika í Harry Potter myndunum?

Rupert: Breytingin er ekki mikil, satt að segja. Ég reyni að lifa eðlilegu lífi. Eina breytingin er sú að það þekkja mig svo margir, en yfirleitt finnst mér það allt í lagi. Þetta er það eina. Ég geri ennþá sömu hlutina og ég var vanur að gera.

Marie: Við töluðum áðan um lærdóminn. Hver eru uppáhaldsfögin þín?

Rupert: Ég held sennilega mest upp á hugvísindi eða listir.

Marie: Hefurðu hugsað þér að fara í háskóla?

Rupert: Ég er ekki alveg viss. Ég er enn á síðasta ári í gagnfræðaskóla og hef ekki ákveðið mig hvað ég ætli að gera í framtíðinni.

Marie: Ef þú héldir áfram í skóla, hvað gætir þú helst hugsað þér að læra?

Rupert: Eitthvað listatengt, það er öruggt. Ég hef aldrei verið góður í hinum almennu námsgreinum en allt sem varðar listir á vel við mig. Og ég hef virkilega gaman af því.

Marie: Hver er uppáhalds-persónan þín í öllum Harry Potter bókunum?

Rupert: Ron hefur alltaf verið uppáhalds persónan mín, meira að segja áður en ég fékk hlutverkið. Mér fannst æðislegt að fá að leika hann vegna þess að ég hélt mest upp á hann.

Marie: Núna þegar þú ert að eldast, og Ron líka, finnst þér þú og hann eiga sameiginleg áhugamál eða deila svipuðum tilfinningum?

Rupert: Það var svo margt sem við áttum sameiginlegt áður en ég fór að leika hann svo ég hef aldrei átt í neinum vandræðum með að tengjast Ron sem persónu. Tökum sem dæmi að við komum báðir úr stórri fjölskyldu, við erum báðir með ljósrautt hár og erum rosalega mikið fyrir nammi. Og svo þolir hvorugur okkar köngulær, sem mér finnst ótrúlega mikil tilviljun.

Marie: Hvað myndir þú segja að væri besta bókin sem þú hefur lesið á síðastliðnu hálfu ári?

Rupert: Ég er að lesa ótrúlega góða bók fyrir skólann eins og stendur - hún heitir „Of Mice and Men". Hún er frábær.

Marie: Ertu búinn að sjá kvikmyndina?

Rupert: Nei, en ég ætla að sjá hana þegar ég þarf að rifja upp bókina fyrir prófið. Ég hlakka mikið til.

Marie: Hvað er það allra undarlegasta sem þú hefur keypt þér síðan tökurnar á Harry Potter myndunum hófust?

Rupert: Ég keypti mér geggjað reiðhjól (eða vélhjól - sama orð?) með risastórum handföngum og það er geðveikt.

Marie: Þegar þú ert í upptöku, máttu hafa hluti hjá þér eins og reiðhjól eða vélhjól?

Rupert: Ég tók einhjólið mitt (unicycle) með mér nokkrum sinnum bara til að sjá hvort mér tækist að hjóla á því en ég er ekki búinn að læra það.

Marie: Hvað ertu búinn að vera lengi á einhjóli?

Rupert: Satt að segja er ég búinn að reyna að hjóla á því í svona tvö ár en það eina sem mér hefur tekist að gera er að stíga svona fjórum sinnum á fótstigin og svo dett ég fram fyrir mig og meiði mig hrikalega.

Marie: Hvað kom til að þig langaði í einhjól?

Rupert: Ég veit það ekki. Mig langaði bara að gera eitthvað allt öðru vísi og ég hef átt venjuleg hjól og hjólað á þeim, svo ég hélt að það yrði svalt að reyna þetta. Trúðar og furðufólk gera þetta í fjölleikahúsum og það virðist svo auðvelt - svo ég reyndi það en þetta er virkilega sárt.

Marie: Hver eru uppáhalds fötin þín?

Rupert: Ég er eiginlega alltaf í gallabuxum, svo við skulum segja að það séu þær.

Marie: Og uppáhalds-nammið?

Rupert: Æ, nú ferðu alveg með mig. Hvað sem er!

Marie: Áttu þér einhvern uppáhaldsmat?

Rupert: Humm, ég er rosalega hrifinn af ís.

Marie: Hvernig ís?

Rupert: Bara hvaða ís sem er. Þegar ég var lítill vildi ég verða íssali og mig langar ennþá í það starf. Það hlýtur að vera „kúl“ að selja ís.

Marie: Ef þú gætir búið til nýja bragðtegund af ís, hvaða bragð væri af honum og hvað myndirðu kalla ísinn?

Rupert: Ég held að það sé búið að finna upp allar bragðtegundir.

Marie: Safnarðu einhverju?

Rupert: Þegar ég var yngri var ég voðalega mikið fyrir að safna jó-jó-um, ég var svo hrifinn af þeim. Ég átti orðið heilt safn af jó-jó-um sem mér fannst æðislegt.

...

Marie: Segðu mér frá hinum nýja Dumbledore prófessor. Hvernig er að vinna með einhverjum nýjum í þessu hlutverki?

Rupert: Jæja, það var auðvitað ofboðslega erfitt að finna einhvern í staðinn fyrir Richard Harris. Hann var eins og skapaður í þetta hlutverk og það var sorglegt að hann skyldi deyja, en þessi nýi leikari, Michael Gambon, hann er virkilega góður. Hann er búinn að endurskapa hlutverkið.

Marie: Hafðir þú séð hann leika einhver önnur hlutverk?

Rupert: Já, já, ég hafði séð hann einu sinni eða tvisvar. Við vinnum ekki mikið með honum en þegar hann mætir á svæðið er hann æðislegur.

Marie: Hvað gerir þú þegar þig langar virkilega að slappa af?

Rupert: Ég er til dæmis nýbyrjaður í golfi og mér finnst það frábært. Það er skemmtilegt.

Marie: Ertu góður golfleikari?

Rupert: Ég hef aldrei týnt golfkúlu, sem er einstakt afrek hvað mig varðar.

Marie: Hvað kom til að þú tókst upp golfíþróttina?

Rupert: Bæði afi minn og pabbi minn voru alltaf í golfi og sumir vinir mínir úr skólanum eru líka í golfi, þannig að ég varð ósjálfrátt hrifinn af því. Svo fór tökuliðið til Skotlands til að taka upp senur. Skotland má segja að sé heimaland golfsins og þegar við vorum í upptökum var golfvöllur þarna rétt hjá, bak við fjallið. Þannig að, júbb, ég var að í golfinu næstum því á hverju kvöldi.

Marie: Ertu hrifinn af einhverri sérstakri tegund bókmennta?

Rupert: Bókmenntategund? Ég hef mikinn áhuga á skemmtisögum, t.d. teiknimyndasögum sem eru fyndnar, og mér finnst hryllingssögur líka frábærar.

Marie: Hefurðu lesið einhverjar bækur eftir Stephen King?

Rupert: Já, nokkrar. Þær eru bara nokkuð góðar.

Marie: Er einhver rithöfundur á Englandi sem mætti kalla Stephen King Englands?

Rupert: Ég held ekki; hann er aðal-spennuhöfundurinn á Englandi líka.

Þýðing: Anna Heiða Pálsdóttir, © 2004.