FRÉTTIR í janúar 2004

Nýtt viðtal við Daniel Radcliffe
Winky, sem rekur frönsku síðuna PotterWorld, sendi Kristin á The Leaky Cauldron enska þýðingu á viðtali við Daniel Radcliffe sem franska blaðið Total Star birti nýlega. Ég þýddi viðtalið svo úr ensku fyrir ykkur. Þú finnur viðtalið HÉRNA á íslensku á glænýju Daniel Radcliffe síðunum.

Og nú er ég búin að setja upp síðurnar um Daniel Radcliffe - viðtöl, myndir o.m.fl. Myndasíðurnar eru ekki allar tilbúnar en þarna er fullt af viðtölum. SMELLTU HÉR.
Sett inn 31. janúar 2004

Orðrómur um Eldbikarinn I og II skotinn niður
Sá orðrómur hefur verið á kreiki að kvikmyndin Harry Potter og eldbikarinn verði að vera í tveimur hlutum vegna þess að bókin sé svo löng. Breksi leikstjórinn segir í frétt EmpireOnline að þetta sé vitleysa. Hann kveðst ætla að gera myndina í einu lagi og segir: „Ég er handviss um að það sé hægt að hafa þetta eina mynd. Mér fyndist það fáránlegt að gera tvær myndir.“
Sett inn 31. janúar 2004

Viltu leika Cho Chang?
Ég veit að það eru ekki miklir möguleikar fyrir þig, en ef þú ert svo heppin að vera 1) u.þ.b. 16 ára, 2) með útlit Asíubúa 3) og átt heima á Englandi, þá er möguleiki fyrir þig að fá hlutverk Cho Chang (stelpunnar sem Harry Potter er hrifinn af) í 4. myndinni, skv. frétt CBBC. Þú verður að uppfylla þessi 3 skilyrði - annars þýðir ekkert að reyna. Áheyrnarpróf verða þann 7. febrúar nk. frá 10:00 - 15:00 í Pineapple Studios, 7 Langley Street, London WC2.
Sett inn 29. janúar 2004

Endir á málaferlum
Nancy Stouffer, rithöfundurinn sem höfðaði mál gegn J.K. Rowling og sagði að hún hefði stolið frá sér hugmyndum, áfrýjaði dómi þar sem ásökunum hennar var hafnað, til æðri dómstóls í New York. Skv. frétt ELD staðfesti áfrýjunardómstóllinn úrskurð dómara í undirrétti.

Nancy Stouffer kærði Rowling fyrir að hafa notað hugmynd úr bæklingi sem hún far út um litlar, hárlausar skepnur sem heita Muggar („Muggles“). Orðið Muggar er notað um fólk í HP sem hefur engan galdramátt.

Stouffer hélt því einnig fram að hún hefði búið til litabók sem kallaðisr „Larry Potter and His Best Friend Lily.” Það er saga um ungan strák, Larry Potter, sem verður að nota gleraugu. Rétturinn komst að því að titilsíðu þeirrar bókar hafði verið breytt. Eina vísunin til Larry Potter var prentuð í letri sem fyrirfannst ekki fyrr en 1993. Allur málflutningur Stouffer reyndist byggður á ósannindum og rétturinn dæmdi hana í 50.000 punda sekt.

Fræðslupunktur: Hvað er áfrýjun? Til eru 2 tegundir dómstóla á Íslandi, Héraðsréttur og Hæstiréttur, eða undirréttur og yfirréttur. Þegar sagt er t.d.: „Jón var dæmdur í Héraði til að borga Gunnari milljón" er átt við „undirrétt". Í undirrétti er yfirleitt 1 dómari. Ef Jón er óánægður með dóminn getur hann „áfrýjað“ dómnum til Hæstaréttar. Í Hæstarétti sitja margir dómarar og dómur hans er úrslitadómur. Stundum finnst Hæstaréttardómurum ekki ástæða til að taka fyrir mál og þá er því VÍSAÐ FRÁ Hæstarétti. Ef máli Jóns er vísað frá Hæstarétti, verður Jón að sætta sig við að borga Gunnari milljón...

Og HÆSTARÉTTARLÖGMAÐURINN, pabbi minn, Páll S. Pálsson, hefði orðið 88 ára í dag ef hann væri á lífi en hann lést 1983. Til hamingju með daginn, pabbi.
Sett inn 29. janúar 2004

Frumsýningardagar þriðju kvikmyndarinnar
Nú hefur fyrirtækið Warner Bros gefið upp frumsýningardaga fyrir Harry Potter og fangann frá Azkaban í mörgum löndum. Hér er listi yfir dagana, staðfestur af Warner Bros (OG VIÐ ERUM FYRST!):

4. júní 2004 Argentína, Brasilía, Kanada, Frakkland, Þýzkaland, ÍSLAND, Ítalía, Rússland, Bretland og Bandaríkin.
10. júní 2004 Ástralía, Tékkland
17. júní 2004 Nýja Sjáland
18. júní 2004 Búlgaría
25. júní 2004 Spánn
26. júní 2004 Japan
15. júlí 2004 Hong Kong
6. ágúst 2004 Noregur

Fleiri staðir verða auglýstir síðar.
Sett inn 25. jan. 2004 kl. 11:50

Fyrir aðdáendur leikaranna
Ég var að rekast á franska síðu með óhemju safni af myndum sem varða Harry Potter, leikarana, Rowling, og svoleiðis. Franskan mín er ekkert voðalega góð! Þið sem viljið sjá myndir af uppáhalds-leikaranum ykkar, smellið hér fyrir neðan og svo skoðið þið síðu 1, 2, 3 o.s.frv.

Ýmsir leikarar í HP-kvikmyndunum (129 stk.)

Myndasíða EMMU WATSON á PotterWorld.com:
Alls konar myndir (5 stk.)
Myndir frá HP1 (15 stk.)
Myndir frá HP2 (87 stk.)
Myndir frá HP3 og afh. Bafta-verðlauna (67 stk.)

Myndasíða RUPERT GRINT á PotterWorld.com:
Alls konar myndir (27 stk.)
Myndir frá HP1 (22 stk.)
Myndir frá HP2 (29 stk.)
Myndir frá HP3 og afh. Bafta-verðlauna (9 stk.)
Myndir frá Kafteini Ofurbrók (6 stk.)

Myndasíða DANIEL RADCLIFFE á PotterWorld.com:
Alls konar myndir (45 stk.)
Myndir frá HP1 (52 stk.)
Myndir frá HP2 (Eitt-hundrað-níutíu-og-fimm stk.)
Myndir frá HP3 og afh. Bafta-verðlauna (6 stk.)
Myndir frá David Copperfield (110 stk.)

Myndasíða TOM FELTON á PotterWorld.com:
Anna og konungurinn (85 stk.)
Myndir frá HP1 (1 stk.)
Myndir frá HP2 (19 stk.)
Myndir frá HP3 (7 stk.)
Myndir héðan og þaðan, t.d. við veiðar (51 stk.)

Myndir úr þriðju kvikmyndinni (mikil upplausn)
Michael Gambon sem Dumbledore
Leikstjórinn Cuarón, Ron og Harry
Emma, Daníel og Ron (með rottu)
Þau þrjú ásamt Siriusi Black í „Shrieking Shack“
Voðalega sæt mynd af Daniel með leikstjóranum Cuarón
Daníel, Emma og fullt af graskerjum
Riddaravagninn, Daniel í götunni
Sirius Black í fangelsinu
Draco Malfoy með fugl úr bréfi (í skólastofu)
Risastór mynd af Emmu og Daniel (skítug í framan!)
Önnur risastór mynd af Daniel einum (með japönsku letri)
Hermione hótar Draco með priki
McGonagall talar við Harry - hinir fylgjast með
Riddaravagninn í dagsljósi
Sett inn 24. jan. 2004 kl. 01:20

Viðtal við Rupert og Daniel
Farðu á þessa síðu og sjáðu smá-myndband með glænýju viðtali við Rupert Grint og Daniel Radcliffe sem kallast „Foreign Invasion“. Smelltu bara á andlitsmyndina af Rupert. Þú verður að hafa Quicktime eða Windows Media í tölvunni þinni.
Sett inn 24. jan. 2004 kl. 00:45

Þriðja kvikmyndin sú stysta?
Samkvæmt frétt CTV verður þriðja myndin 2 1/2 tími að lengd, og sú stysta af þessum fyrstu þremur. Á þeirri síðu er að finna ýmsar fréttir af öðrum væntanlegum framhaldsmyndum.
Sett inn 24. jan. 2004 kl. 00:30

Harry fær sér nýja kápu
Útgáfufyrirtækið Bloomsbury hefur tilkynnt að fljótlega muni fyrstu fjórar bækurnar koma út með nýjum kápum í „fullorðins-stíl“ í takt við þá fimmtu. Skv. fréttatilkynningu frá fyrirtækinu er salan í „fullorðins-útgáfunni“ 10% af heildarsölunni. Bækurnar koma út 8. júlí 2004 - á 4 ára útgáfuafmæli Harry Potter og eldbikarsins. Sjáðu þær hér:
1. Harry Potter og viskusteinninn
2. Harry Potter og leyniklefinn
3. Harry Potter og fanginn frá Azkaban
4. Harry Potter og eldbikarinn
Sett inn 24. jan. 2004 kl. 00:10

Annað viðtal við leikarana - nú á SciFi
Hér er enn eitt viðtalið, sem ég þýddi lauslega af SciFi-síðunni. Viðtalið ber yfirskriftina „Potter Stars Talk Cuaron“ (Potter-stjörnurnar tala um Cuaron, leikstjóra þriðju myndarinnar.

„Ungu leikararnir í væntanlegri kvikmynd, Harry potter og fanganum frá Azkaban, sögðu blaðamanni SCI FI að það hafi verið öðruvísi, á skemmtilegan hátt, að vinna með nýja leikstjóranum, Alfonso Cuarón, sem tók við starfinu af Chris Columbus.

„Það var sérstaklega skemmtilegt fyrir mig, þar sem ég hef aldrei áður leikið í kvikmyndum, að vinna með nýjum leikstjóra og gera hlutina öðruvísi, að læra nýja tækni, kynnast nýjum hugmyndum og allt svoleiðis,“ sagði Emma Watson (Hermione) þegar blaðamaður ræddi við hana í hléi á upptökum í kvikmyndaverinu í London. „Ég hafði ferlega gaman af þessu öllu.“

Mexíkanski leikstjórinn Cuarón tók við hlutverkinu af Chris Columbus sem leikstýrði fyrstu tveimur myndunum. „Maður sér mikinn mun á þessum tveimur,“ segir Emma. „Ég er bara búin að sjá nokkra búta úr þriðju myndinni en Alfonso hefur gert stórkostlega hluti með því að breyta um sjónarhorn og nýta sér myndavélarlinsuna á frumlegan hátt. Og þessi mynd flæðir meira áfram. Ég veit ekki hvernig er hægt að útskýra það. Maður sér bara muninn. Sérstaklega út af leikstjóranum, hann gefur svo mikið af sér í verkið og maður sér greinilegan mun. Það er frábært. Myndin er virkilega góð.“

Emma Watson og hinar aðalstjörnurnar, Daniel Radcliffe (Harry) og Rupert Grint (Ron) voru sammála um að Cuarón leggi áherslu á að nú séu persónurnar orðnir unglingar. „Chris var svo ofboðslega orkumikill þegar verið var að taka upp senur og það hentaði vel fyrir fyrstu tvær myndirnar,“ sagði Radcliffe. „Og hann gerði tvær einstakar myndir. Það er rólegra yfirbragð hjá Alfonso í þessari þriðju mynd, hann er tilfinningaríkur og leikstýrir af mikilli einurð.“

Emma Watson bætir við: „Já, og hann vildi hlusta á hvað okkur fannst um persónurnar og sagði oft svona, hvernig myndir þú gera þetta? Og svo sagði hann jafnvel, nei, ég ætla ekki að segja þér hvernig þú átt að gera þetta. Það verður að koma frá þínu hjarta og þinni reynslu og svoleiðis.“

Kvikmyndin Harry Potter og fanginn frá Azkaban, sem byggir á þriðju metsölubókinni frá J.K. Rowling, verður frumsýnd þann 4. júní.
Sett inn 23. jan. 2004 kl. 23:50

Hin nýja Emma Watson

Leikararnir tjá sig
Vefsíðan The Leaky Cauldron hefur nýlega birt viðtal við krakkana þrjá í aðalhlutverkunum í Harry Potter myndunum, þar sem þau tjá sig um nýjustu myndina, Harry Potter og fangann frá Azkaban.

Spurning: Hvað finnst ykkur vera áhugaverðasta senan sem þið lékuð í, eða sú erfiðasta?

Rupert: Það eru margar góðar senur. Sú sem ég held mest upp á er þegar ég er „dreginn“ - hún er rosalega góð, það er hundur sem dregur mig inn í tré. Hundurinn dregur mig með sér inn í tréð og ég þurfti að vera með ól utan um fótinn og láta draga mig eftir jörðinni, það var virkilega skemmtilegt. En líka erfittt, vegna þess að ég gleypti fullt af grasi í leiðinni.

Daniel: Og þú þurftir líka að passa þig á myndatökuvélinni.

Rupert: Jahá.

Emma: Hann var alltaf hreint að rekast utan í myndatökuvélina.

Rupert: Ég sparkaði svo fast í hana að linsan fór af.

Daniel: Það er mikilvægt að taka fram að hann meiddi ekki myndatökumanninn!

Daniel: Fyrir mig var skemmtilegast þegar ég var í senu með Gary Oldman, Alan Rickman, Timothy Spall og David Thewlis, öllum í einu, og ég hugsaði með mér: „Vá, þetta er frábært!“ Skilurðu, maður er umkringdur stórkostlegum leikurum, og það getur varla orðið betra. Erfiðasta senan - ég hugsa að það sé sama senan, því að ég varð að leggja mig allan fram, með tilliti til þess að ég var að leika með Gary Oldman og David Thewlis og Alan Rickman og Timothy Spall, svo ég varð að gera mitt allra, allra besta. Það var líka ferlega erfitt að sýna þegar sálin var dregin út úr mér.

Emma: Ég verð að segja það sama og Daníel að senan í „Shrieking Shack“ var hrikalega erfið. Þetta tók svo langan tíma. Við vorum að þessu í —

Daniel: Var það ekki heill mánuður?

Emma: Ef ekki meira. Þetta er svo flókin sena og það gerist svo margt í henni, og það var alltaf verið að breyta einhverju, og það var svo erfitt og tók mikið á mann tilfinningalega. Ekki svona á væmin hátt, heldur —

Daniel: Maður verður eitthvað svo tómur eftirá —

Emma: Já, einmitt, maður er alveg búinn.

Daniel: Svo bættist það ofaná að veggirnir gengu til og það ískraði í þeim, svo við gátum ekki heyrt hvað hinir voru að segja ...

Emma: Þessvegna þurftum við að tala helmingi hærra.
Sett inn 22. jan. 2004 kl. 23:50

Nýjar myndir úr Fanganum
Alltaf eru að koma fram fleiri kyrrmyndir úr þriðju myndinni. Ef þú smellir hér sérðu flotta mynd af þremenningunum (Harry, Ron og Hermione, hún er svolítið lengi að koma upp, mikil upplausn). Þessi mynd fylgdi grein um HP í LA-Times. Og þessi líka, sem sýnir Emmu tala við Alfonso Cuaron, leikstjóra myndarinnar:

Dýrasta kvikmynd allra tíma?
Breska veftímaritið Sunday Mail flytur þær fréttir að Harry Potter og eldbikarinn verði sennilega dýrasta mynd allra tíma. Þetta hefur blaðamaður eftir leikstjóranum Mike Newell.
..... Harry Potter og eldbikarinn, fjórða myndin, mun kosta um 170 milljónir punda - sem er 5 millj. punda meira en Hilmir snýr aftur, síðasta myndin í LOTR þríleiknum.
..... Myndatökur munu hefjast í apríl. Newell, sem á að baki geysivinsælar myndir á borð við Fjögur brúðkaup og jarðarför og nýju myndina með Juliu Roberts, Bros Mónu Lísu, segir: „Mér finnst ég vera einstaklega heppinn. Ég ætla að gera dýrustu mynd sem hefur nokkurn tíma verið framleidd.“
..... Newell neitar því ekki að mikil ábyrgð fylgi leikstjórn kvikyndar um Harry Potter. Hann segir: „Það bíða fleiri milljónir af 10 ára krökkum sem ekki má valda vonbrigðum. Að leikstýra Harry Potter er eins og að taka að sér hlutverk forseta Brasilíu. Maður fær stórt hlutverk í hendur.“
..... Harry Potter og eldbikarinn, sem verður frumsýnd árið 2005, mun skarta Daniel Radcliffe í aðalhlutverki sem galdrastrákurinn Harry og Robbie Coltrane í hlutverki Hagrid, hálfrisans sem gætir skólalóðarinnar á Hogwartskóla.
..... Einn mesti höfuðverkur Newells hingað til hefur verið að finna 2,5 m háa franska konu til að leika konuna sem Hagrid er skotinn í, Maddömu Maxime.
..... Hann segir: „Við erum að finna fólk í hlutverk eins og stendur. Ég er búinn að fara til Parísar til að leita að risavöxnum konum og frönskum skólastelpum.“
..... DÆMI UM DÝRUSTU KVIKMYNDIRNAR HINGAÐ TIL: Hilmir snýr aftur, 2003, kostaði 165 millj. punda og Titanic kostaði 112 millj. punda.
Sett inn 22. jan. 2004 kl. 23:20

Jólin eru búin - Anna snýr aftur
Jæja, allir. Gleðilegt ár og þakkir fyrir öll þau gömlu. Afsakið fjarveruna, ég var veik og svoleiðis. Einhver spurði í hvaða uppskurð ég fór - það var við vélindabakflæði (vélinda liggur frá hálsi niður í mallakút). En í dag er ákkúrat MÁNUÐUR síðan ég snerti þessa síðu svo það er kominn tími til að bretta upp ermarnar.
Sett inn 20. jan. 2004 kl. 20:30

TIL AÐ SJÁ FLEIRI ELDRI FRÉTTIR, smelltu hér.