Uppfærsla 3. des.
Þið eruð dugleg að senda inn álit á 6. bókinni. Nú hefur Sebebolimus svarað Lilju - og Katta, góðvinur síðunnar, sendi líka inn sitt álit þótt hún sé á kafi í prófum. Fyndið að hvorugt þeirra vissi af svari hins, þannig að ég set þau bæði inn í einu. Sjáið hvað þau hafa að segja hér. Í gær bættist þriðji kaflinn við áhugaspuna TINNU um HERRANN SNÝR AFTUR sem ég er búin að setja á sérstaka síðu. KITTA sendi mér ljóðið sitt um Harry Potter og það er komið inn á aðal-áhugaspuna-síðuna.
Sett inn 3. des. 2003 kl. 23:26

Harry Potter númer 5 kemur út í Frakklandi
Bonsjúr! Miðvikudagurinn 3. desember er HP-dagur í Frakklandi. Fimmta bókin kom á markaðinn fyrr í dag, um hálfu ári eftir útgáfudaginn á Englandi. Hún var prentuð í milljón eintökum að sögn útgefandans, Gallimard Jeunesse. Svona lítur kápan út hjá Frökkum:

Sett inn 3. des. 2003 kl. 23:15

Lucius Malfoy snýr aftur
Jason Isaacs, sem leikur Lucius Malfoy, pabba Draco, í Harry Potter og leyniklefanum segir í viðtali við IMDB að hann myndi grátbiðja um að fá að leika í 4. myndinni:

„Þegar við vorum rétt að ljúka myndatökum á Leyniklefanum kom Alfonso Cuaron (leikstjóri 3. myndarinnar) til að kynna sig fyrir okkur og ég tók í höndina á honum og það var allt og sumt. Myndatökurnar á Fanganum frá Azkaban komu í kjölfarið. Ég er viss um að allir skemmtu sér vel. En ég veit ekki hvað stendur til með Eldbikarinn. Ég hringdi til að spyrja og mér var sagt: „Fyrirgefðu, við vitum ekki neitt. Við vorum bara að fá handritið í hendurnar ...“ Það eru svona 700 blaðsíður sem þarf að breyta í tveggja tíma kvikmynd, svo ég veit ekki hvort Lucius Malfoy fær að vera með eða ekki. Ef ég væri viss um að það virkaði að grátbæna þá, myndi ég fara þangað daglega. En það færi sennilega bara í taugarnar á þeim.“
Sett inn 3. des. 2003 kl. 22:50

Aukahlutverk í Eldbikarnum seljast á meira en eina milljón ISK
Samkvæmt fréttum breska dagblaðsins The Daily Record var haldið uppboð til styrktar góðu málefni (MS eða Multiple Sclerosis sjúkdómnum) sl. fimmtudagskvöld, þann 28. nóvember. Gestir á uppboðinu, sem fór fram í Edinborg, greiddu 175 bresk pund í aðgangseyri, en það samsvarar um 20 þúsund íslenskum krónum. Einn gestanna greiddi 35.000 pund (næstum fjórar og hálfa milljón ísl. kr.) fyrir sjaldgæft, áritað eintak af Fönixreglunni. Eina sambærilega, leðurinnbundna eintakið af bókinni sem til er, tilheyrir Rowling sjálfri.

Ýmislegt annað var í boði. Til dæmis greiddi einhver 10.000 pund (næstum eina og hálfa milljón íslenskar) fyrir samstæðu af fjórum fyrstu bókunum sem Rowling hafði undirritað.

Tvö aukahlutverk í kvikmyndinni um Harry Potter og eldbikarinn seldust á 10.000 pund og 9.000 pund, en það er yfir milljón íslenskar krónur. Tökur á myndinni hefjast í apríl 2004. Fótbolti áritaður af David Beckham seldist á 7.000 pund (næstum eina milljón ISK) og fígúra af húsálfinum DOBBY seldist á 3.500 pund (um hálfa milljón).

Eins og þið eflaust vitið var móðir Rowling með MS og lést úr þeim sjúkdómi aðeins 45 ára að aldri. Rowling mætti í veisluna í skoska þjóðminjasafninu ásamt eiginmanni sínum, Neil. Forsvarsmaður góðgerðasamkomunnar, Mark Hazelwood, sagði: „Sú fjárhæð sem safnaðist í kvöld mun hjálpa til við að láta drauma okkar rætast.“

Vonandi, segi ég, umsjónarmaður HP-síðunnar, sem þekkir fólk með MS-sjúkdóminn. Þetta er taugasjúkdómur sem gerir einstaklinga smám saman meiri hreyfihamlaða. Því fé sem safnaðist verður veitt til rannsókna. Þær rannsóknir gagnast MS-sjúklingum um allan heim og vonandi verður hægt að finna lækningu við sjúkdómnum sem fyrst.
Sett inn 2. des. 2003 kl. 00:15

Lokapartí Fangans frá Azkaban
Hérna um daginn sagði ég frá því að haldið hafi verið mikið lokapartí fyrir aðstandendur þriðju myndarinnar. Fulltrúi vefsíðunnar HP4U.co.uk fór í veisluna og skrifaði nákvæma lýsingu daginn eftir. Þetta var víst skemmtilegt boð:

Það virðist ekki skipta máli hversu margir aðdáendur safnast í kringum hann [Daniel Radcliffe], hann gefur sér alltaf tíma til að gefa eiginhandaráritanir. Við hittum hann andartak í veislunni og núna gaf hann sér tíma til að spjalla við okkur. Mikill stelpuhópur hafði safnast allt umhverfis hann og hann var að skrifa á fullu en virtist hamingjusamur í þessu hlutverki sínu. Við spenntum upp regnhlíf og spjölluðum við hann smástund. Við spurðum hann nokkurra spurninga sem ég set í loftið þegar færi gefst. Þetta var auglýst sem veisla til að halda upp á að kvikmyndatökum væri lokið („the end-of-filming party“) en Daniel og nokkrir aðrir verða fastir í myndatökum til jóla.
Sett inn 1. des. 2003 kl. 23:50

Samkeppni um skjámynd („Wallpaper Competition)“
Vefsíðan Mugglenet, sem ég vitna svo oft til, er nú búin að setja af stað samkeppni um bestu Harry Potter jóla-skjámyndina („Harry Potter wallpaper with a Christmas theme“). Vefsíðan setur engar sérstakar reglur um samkeppnina, nema aðstandendur taka fram að þeir kunna að meta frumkvæði og eitthvað „öðruvísi“. Þeir vilja líka taka fram eftirfarandi í sambandi við stærðina:

1) Vinsamlegast gerið skjámyndina („wallpaper“) í stærðinni 800x600 og 1024x768.

2) Vegna stærðarinnar á pósthólfi viðtakenda biðja þeir ykkur vinsamlegast að senda ekki inn myndir sem eru stærri en 4 megabyte. Ef skjámyndin þín er „þyngri“ en það, viltu vinsamlegast senda smækkaða mynd eða tengil á síðu þar sem hana er að finna í fullri stærð. Viðtakendur kjósa frekar mynd sem er sett inn í tölvupóst („embedded“) en mynd sem er send sem viðhengi.

Sendu þína hugmynd á þennan tölvupóst. Lokaskiladagur er 16. desember en þá munu tillögur 10 þátttakenda sem komast í úrslit verða settar upp á vefsíðu Mugglenet þannig að almenningur geti kosið um þær. Í verðlaun er árituð ljósmynd af Matthew Lewis (sem leikur Neville Longbottom í myndunum). Gangi ykkur vel!
Sett inn 1. des. 2003 kl. 23:11

Gary Oldman talar um Fangann frá Azkaban SPOILER (ekki lesa ef þú hefur ekki lesið 5. bókina!)
Tölublað nr. 174 af Empire Magazine var með stutt viðtal við Gary Oldman (sem leikur Sirius Black í þriðju myndinni) og segir m.a.:
„Ég hef ekki lesið fimmtu bókina en einhver sagði mér óvart frá því hvernig bókin endar. Það eru ekki góðar fréttir, eða hvað?“ Þó svo að Gary viti að Rowling hafi eitthvað slæmt í hyggju varðandi persónuna sem hann leikur, Sirius Black, skemmtir Gary sér vel við myndatökurnar á þriðju kvikmyndinni um Harry Potter. „Alfonso er með sérstakar hugmyndir um hana,“ segir hann. „Ég held að þetta verði besta myndin hingað til en hú ner sérstök.“
Sett inn 1. des. 2003 kl. 23:22

LEYNIKLEFINN TILNEFND TIL BAFTA-VERÐLAUNA
Harry Potter og leyniklefinn var tilnefnd sem vinsælasta kvikmyndin í flokki barnakvikmynda hjá bresku kvikmyndaakademíunni („British Academy Children's Film and Television Awards"). Leyniklefinn sló meira að segja út Turnana tvo í myndaflokknum um Hringadróttins-sögu, en þúsundir breskra barna völdu myndina í „Lego/Bafta Kids' Vote“. Sjáið fréttina um þetta á BBC og mynd af Emmu Watson, skælbrosandi.
Sett inn 1. des. 2003 kl. 22:52

HOLD YER HIPPOGRIFFS (Stillið ykkur, Hippógriffín)
Ég er búin að fá svo mikið af áhugaspuna, m.a. viðbót frá ELLA DI á ÞORPINU og enn meira frá SEBEBOLIMUS. Þetta hefur tekið mig nokkra daga, með yfirlestri o.fl. Það bíða fleiri sögur og ljóð sem ég set inn næstu daga. Kærar þakkir, þið öll. Svo koma meiri fréttir við tækifæri, þegar höfundarnir fá ritstíflu.
Sett inn 1. des. 2003 kl. 22:44

Nýja lúkkið
Hin opinbera síða Warner Bros (og sú sem fyrirtækið vildi helst að væri eina síðan) hefur fengið nýtt útlit. Smelltu hér til að skoða þetta nýja Quidditch-útlit.
Sett inn 26. nóv. 2003 kl. 21:50

Komin í þrælavinnu!
Ég held að það ætti bara að fara að loka mig inni einhvers staðar. Einn aðdáandi spurði mig hvað hefði orðið af „listanum“ þar sem fólk skráði sig í íslenska aðdáenda-klúbbinn. Ég fékk auðvitað *samvisku* og fór að hugsa um ykkur sem skráðuð ykkur í klúbbinn og svo er hann bara horfinn. Af því að ég vil fara upp en ekki niður þegar ég dey, ákvað ég að draga upp þennan lista. Púff, hann er alltof langur! Svo er ég búin að sitja og færa inn HANDVIRKT á nýja síðu þá sem höfðu skráð sig, og raða upp í stafrófsröð og allt. Þetta er örugglega margra kvölda vinna. Listinn var 38 blaðsíður og ég er bara búin með 8.

Þið getið séð listann eins og hann lítur út í dag hérna. Skrifið endilega til hinna á listanum. Ekki skrifa til mín, takk, ég hef nóg að gera á næstunni að færa þetta inn. Og segið nokkur falleg orð út í alheiminn um gömlu konuna sem nennir að halda þessari síðu uppi fyrir ykkur. Og þakkið Stöð 2 fyrir að vera með svona lélega dagskrá, þá hef ég nægan tíma til að sinna síðunni.
Sett inn 25. nóv. 2003 kl. 23:08

Viðtal við „Crabbe“

Hin frábæra fréttasíða The Leaky Cauldron tók Jamie Waylett tali á dögunum. Jamie er strákurinn sem leikur Crabbe í Harry Potter myndunum. Hann á sér kannski ekki eins stóran aðdáendahóp og Rupert og Danny - e.t.v. vegna þess að strákurinn er íturvaxinn (mér finnst hann nú ekkert síðri fyrir það). En hann er frábær og þetta segir í viðtalinu:

Þegar Jamie Waylett kom heim úr skólanum einn daginn og sagði „Ég ætla að leika í Harry Potter“ héldu hvorki mamma hans né fjölskylduvinurinn (nú umboðsmaður), John Inniss, að hann hefði mikinn möguleika á hlutverki. En Jamie hafði einu sinni haft betur í baráttunni við örlögin - og það svo meistaralega að hinir fullorðnu hefðu mátt vita á hverju þau áttu von.

Þegar Jamie var 9 ára lenti hann undir bíl og var ekki hugað líf. Læknarnir sögðu að þótt hann lifði af hefði hann sennilega hlotið of mikinn heilaskaða til að geta lifað eðlilegu lífi. Þegar móður hans var sagt að drengurinn hefði lent í slysi var henni eingöngu tilkynnt að hann væri fótbrotinn á báðum fótum.

„Ég keyrði upp á spítala og hugsaði, sá fær að heyra það,“ segir hún og sýnir handahreyfingar eins og hún ætli að kyrkja einhvern. „Ég ætlaði að ganga frá honum. Vegna þess að ég var bara að hugsa um fótbrot. Mér kom ekki til hugar, þið vitið . . .“ Hún hristir höfuðið.

Þegar Teresa Waylett kom á spítalann kom hún að syni sínum meðvitundarlausum. Jamie var á gjörgæslu í þrjá daga og á þeim tíma settu læknarnir nagla í fótleggi hans en það tíðkast ekki á Englandi. . .

Lestu endilega meira af þessu viðtali á ensku og sjáðu hvernig strákurinn náði að tala og ganga aftur, ótrúlegt. Og þegar leitað var eftir leikurum í skólanum hans, kom hann fyrst til greina sem Dudley Dursley og síðan var ákveðið að hann fengi hlutverk Crabbe. Nú er hann svo þekktur um allt Skotland að hann er stöðvaður á götu og beðið um eiginhandaráritanir.
Sett inn 25. nóv. 2003 kl. 21:08

Mikið fjör, svaka partý
Á sunnudagskvöldið (23. nóv.) hélt fólkið sem stendur að þriðju HP-kvikmyndinni það sem kallað er „Wrap-up“ partí til að fagna því að tökum á myndinni sé lokið. The Leaky Cauldron segir frá veislunni:

„Það var kalt og mikil rigning en allir skemmtu sér vel þrátt fyrir veðrið. Hundruðir gesta, leikarar, tökulið og fjölskyldur þeirra voru samankomin til að horfa m.a. á flugeldasýningu við tónlistarundirleik sem jafnaðist á við það besta sem Disney-fyrirtækið gæti boðið upp á.

Dan, Rupert, Emma, Tom, Jamie, Josh og aðrir leikarar (engir fullorðnir leikarar) voru mættir á staðinn, sem og leikstjórinn Alfonso Cuaron og aðrir aðstandendur myndarinnar. Í risatjaldinu var borið fram heitt súkkulaði með sykurpúðum (marshmallows - heyrirðu það, Tinna sykurpúði) og candyfloss fyrir börnin en fullorðna fólkið drakk það sem Bretar kalla „mulled wine“ (og við köllum jólaglögg) og bjór. Einnig var boðið upp á mat: pylsur, hamborgara og bakaðar kartöflur með ýmsum fyllingum. Skemmtiatriði voru af ýmsu tagi, t.d. galdrabrögð, töframenn og mexíkósk hljómsveit sem spilaði við Riddaravagnana.“
Sett inn 25. nóv. 2003 kl. 20:33

Finnska útgáfan af Fönixreglunni
Þá eru Finnar búnir að koma út fimmtu bókinni og þú getur séð kápumyndina hér á Mugglenet. HARRY POTTER JA FEENIXIN KULTA, heitir gripurinn. Óttalega eru allri orðnir nefstórir þegar þeir koma til Finnlands. Eru þetta Múmínálfa-áhrif?
Sett inn 25. nóv. 2003 kl. 20:33

Simpsons-brot
Katta fréttamaður sendi mér fréttaskot: Mugglenet er búið að setja upp smá-vídeó-bút úr sjónvarpsþættinum um Simpsons-fjölskylduna þar sem J. K. Rowling kemur fyrir sem ein af persónunum. Smelltu hér og HÆGRI-smelltu síðan á Video Clip (og veldu „save target as...“). Katta mín, gangi þér vel í prófunum - og þetta gildir fyrir ykkur öll hin líka.
Sett inn 25. nóv. 2003 kl. 20:30

Rowling í Simpsons

Meiri spádómar og meiri áhugaspuni
Það er líf í ykkur og margir góðir rithöfundar og spámenn leynast í ykkar röðum. Ég fékk annan kafla af „Herranum“ frá TINNU í gær og í dag fékk ég viðbót við „Litla þorpið“ frá Alla Di (sem sendi fyrsta hlutann i nn í gær. Þetta er komið inn á Fan-fiction (áhugaspuna) síðuna. Rowling getur bara farið að hætta þessu pári ... þið takið við. Spámaðurinn Kitta sendi mér sitt álit á því sem gerist í sjöttu bókinni. Takk, Kitta! Sjáið kenningar hennar hér.
Sett inn 25. nóv. 2003 kl. 20:30

Svo bregðast krosstré sem önnur tré
Fyrrum eiginmaður Rowling reyndi hérna um árið að stórgræða á því að selja kjaftasögur um hana til breskra slúðurblaða (og það tókst). Nú virðist sem pabbi hennar ætli sér líka sneið af kökunni. Skv. fréttum Contactmusic.com ætlar sá gamli að næla sér í nokkrar krónur með því að notfæra sér ættartengslin. PETER ROWLING ætlar að setja sjö bækur af fyrstu útgáfunni, allar með persónulegum eiginhandaráritunum frá dóttur hans, á uppboð. Ein af þeim er árituð á hjartnæman hátt til hans frá J.K.

Í þessari grein á Contactmusic segir að áritun sem sést í upphafi Eldbikarsins sýni að persónan RON WEASLEY sé byggð á gömlum fjölskylduvini sem heitir RONALD RIDLEY - en J.K. hefur viljað haldað því leyndarmáli innan fjölskyldunnar.

Þar stendur: „Elsku pabbi minn. Ef ég hefði kallað hann Ronald (Weasley) Ridley, hefðu menn farið að reyna að finna vesalings manninn . . . en þess vegna kallaði ég hann Ron, auðvitað!“

Uppboðið mun fara fram í SOTHEBY'S í New York þann 10. desember nk. Ætli Joanne hafi gleymt að færa pabba sínum jólagjafir um síðustu jól? Mikið hrikalega myndi það særa mig ef einhver í minni fjölskyldu reyndi að hagnast á því að selja bók með persónulegri áritun frá mér ...
Sett inn 24. nóv. 2003 kl. 22:30

Slæm þýðing
Ég stend við það statt og stöðugt að þýðingin á HP-5 sé ekki góð. Sjáið þetta dæmi sem Katta vinkona mín benti mér á:
SCHOLASTIC ÚTGÁFAN, bls. 382:
Hagrid segir: „Hold yer Hippogriffs“ við Hermione. Þetta er rosalega fyndin útsetning á enska máltækinu „Hold your horses,“ sem þýðir beint: „Bíddu nú aðeins við.“ Eða í yfirfærðri þýðingu: „Haltu aftur af hestunum þínum.“ Í staðinn fyrir „horses“ hefur Rowling sett Hippogriffs! Sniðugt, já, í anda hennar, með góðum húmor.
ÍSLENSKA ÚTGÁFAN, bls. 373:
Hagrid segir: „Stilltu þig, Hippógriffín,“ við Hermione. Æ, Æ, æ, æ ,æ. Hann myndi aldrei kalla hana Hippógriffín. Hún á að halda aftur af hestunum (Hippógriffínunum) sínum. HÚN ER EKKERT HIPPÓGRIFFÍN og hananú! Hún á að hafa taumhald á Hippógriffínunum, eða þannig sko.
Fleiri ábendingar þegnar, og takk, þú skarpskyggna Katta.
Sett inn 24. nóv. 2003 kl. 21:30

Viðtal við Alan Rickman
Í nýju viðtali á Handbag.com talar Alan Rickman m.a. um reynslu sína í hlutverki Snape í Harry Potter kvikmyndunum. Þar segir til dæmis:

„Hlutverk Snape prófessors virtist eins og sniðið fyrir þig . . . það var eitthvað við það sem virtist eins og þú værir bæði að njóta þín og samt eins og klemmdur. Fannstu fyrir þeirri tilfinningu?“

„Þetta er góð lýsing á tilfinningunni, satt að segja. Vegna þess að svona er persóna Snapes. Hann virðist rólegur og yfirvegaður persónuleiki. Vandamálið er að það er svo margt sem við vitum ekki vegna þess að J.K. Rowling hefur ekki látið það uppi. Ég veit svolítið um það sem þið vitið ekki og ég ætla ekki að segja neitt . . . “
Sett inn 23. nóv. 2003 kl. 21:05

Enn meiri upplausn
Skv. frétt The Leaky Cauldron er nú hægt að sjá kyrrmyndir úr HP-3 í enn meiri upplausn. Hér hótar Hermione Draco og hér er nærmynd af hinum gullfallega Danny Radcliffe sem Harry. Hér er mynd af Daníel, Stan og strætisvagninum.
Sett inn 23. nóv. 2003 kl. 21:00

STAFSETNINGAR- OG MÁLFRÆÐIVILLUR
Eins og þið vitið flest skrifaði ég ritdóm um HP-5 í Moggann á þriðjudaginn. Ég fékk símtal í gærkvöldi þar sem viðmælandi minn sagði að það væri vitleysa að bókin væri illa prófarkalesin. ÞIÐ SEM HAFIÐ VERIÐ AÐ ÓSKAPAST YFIR VILLUM, sendið mér endilega ábendingar, með blaðsíðutali, svo ég geti bara sett þær hér inn. Líka villur í þýðingunni, takk fyrir.
Sett inn 23. nóv. 2003 kl. 14:40

FAN-FICTION OG FLEIRA
Allur dagurinn í gær OG Í DAG, sunnudag hafa farið í að uppfæra. Ég sem ætlaði að taka til í húsinu hjá mér. Ég fór í gegnum hrúgur af tölvupóstum til að bæta inn myndum, afmælisdögum og fleiru. Þetta eru aðal-uppfærslurnar.

1) Nú er ég búin að fá fyrsta HP-Fan-Fiction bréfið og setti söguna inn á Netið. Farðu á Fan-Fiction-síðuna til að skoða kaflann sem Tinna sendi.

2) Ég bætti inn enn fleiri ljósmyndum af fastagestum (Hauki Heiðar, Klöru, Fluffzter, Guðnýju o.fl.). Farðu á Fastagesta-síðuna til að sjá allt liðið.

3) Það eru komnir inn fleiri afmælisdagar í afmælisdagabókina. Munið að athuga annað slagið og senda afmælisbarninu kveðju.

4) Í gær lagaði ég listaverkasíðuna en þar eru góðar FAN-ART teikningar.

5) Ég er stöðugt að uppfæra tenglasíðurnar, bæði á íslenskar síður og erlendar síður - núna er fullt af nýjum tenglum..

6) OG JÁ, ég fékk „spádóm“ frá einum lesanda um hvað muni gerast í 6. bókinni. Farðu á síðuna um 6. bókina og sjáðu hvað AlliJ hefur að segja um það sem Lucy spáði. Fleiri spádómar velkomnir.

Sett inn 23. nóv. 2003 kl. 14:50

Nóg af myndum
Þegar Harry Potter og leyniklefinn kom út á DVD fyrr á þessu ári var haldin rosa veisla í stúdíóinu í Leavesden sem er rétt hjá London. Síðan RADNETCAFE.COM er með fjórar síður af flottum ljósmyndum af leikurunum sem voru teknar við þennan atburð.
Sett inn 21. nóv. 2003 kl. 23:40

Ein af myndunum á þessum síðum ...

Rowling tilnefnd til Spirit of Scotland verðlaunanna
Skv. frétt Scotland Today hefur Rowling verið tilnefnd til hinna svokölluðu Spirit of Scotland Top Scot verðlauna. Blaðið segir að Rowling sé ekki bara ríkari en Bretadrottning, heldur hafi hún gjörbreytt viðhorfi milljóna barna til bóklestrar. Rowling lítur á Skotland sem fósturjörð sem hefur ættleitt hana. Hún er í fararbroddi samtaka sem berjast fyrir auknum rannsóknum á MS-sjúkdómnum – en móðir hennar dó af völdum hans aðeins 45 ára að aldri. Ef þú smellir á slóðann neðst á fréttasíðu Scotland Today getur þú horft á tilkynningu um tilnefninguna í Real Player. Kærar þakkir til Köttu fyrir ábendinguna.
Sett inn 21. nóv. 2003 kl. 23.20

Uppfærsla föstudaginn 21/11
Þátturinn IDOL var ekkert svo skemmtilegur í kvöld (endursýningar - en rosalega er ég ánægð að Jón Sigurðsson hafi komist áfram, hann er æðislegur) þannig að ég hef verið að uppfæra. Líttu á erlendu tenglana, ég er búin að finna FULLT af nýjum tenglum og taka út gamla sem voru hættir að virka. Þetta tók langan tíma. Eins gott að tékka á þeim annað slagið - sumir vísa allt í einu inn á lítið æskilegar síður. Ég bætti líka inn tenglinum hennar Fluffzter á íslensku tenglana (þetta er Rupert Grint aðdáendasíða). Líttu líka á síðuna um 6. bókina. Ég setti þar inn kenningar um hvað muni gerast sem ég tók af Mugglenet í dag og þýddi. EKKI LÍTA Á ÞAÐ NEMA ÞÚ HAFIR LESIÐ 5. BÓKINA. SPOILER! Ó, ég er svo dugleg, dugleg ... og þið líka, heimsóknirnar eru að komast í 90.000!
Sett inn 21. nóv. 2003 kl. 21:30 og uppfært kl. 23:00

Fréttabrot
Það er ekkert sérstakt að frétta. Tja, Weasley tvíburarnir heimsóttu sjúkrahús (fallega gert hjá strákunum), þú getur séð stærri mynd af Harry og Ron og Hermione, Harry og Ron úr Fanganum frá Azkaban, þú getur séð hvernig Rowling kemur út í Simpsons-þáttunum (hún er önnur frá vinstri á myndinni á þessari síðu).
Sett inn 20. nóv. 2003

Uppfærsla 20/11
Ég var að gera sérstaka leikjasíðu og aðra síðu um leiki í gangi. Ekki halda að ég sitji bara og horfi á Beðmál í borginni.
Sett inn 20. nóv. 2003

Bömmer ...
Hvernig fær sumt fólk ánægju út úr lífinu? Hér er ég loksins komin í stuð til að gera almennilega síðu og þá skrifar eitthvert fífl í gestabókina hvort ég sé ekki „of gömul“ til að vera með svona síðu. Halló? Eiga krakkar bara að skemmta krökkum? Eru kvikmyndaframleiðendur ekki „of gamlir“ til að gera fantasíumyndir? En ég bít bara á jaxlinn og held áfram með síðuna þangað til ég verð 100 ára, ha, ha, ha.
Sett inn 20. nóv. 2003

Uppfærsla 17/11
Ég er byrjuð að uppfæra síðurnar um Tom Felton. Renndu niður í LEIKARAR og smelltu á nafnið hans ...

„ASK DAN“ verkefni
Hér fyrir neðan segir frá því að þið getið lagt fyrir Dan spurningar. Stjórnandi DanRadcliffe.com (Jenna) hefur þegar fengið um 2.500 tölvupósta með spurningum. Hún segir að margar spurningar séu stórgóðar en aðrar eru allt of óviðeigandi. Hún minnir á það að persónulegar spurningar verða hunsaðar, t.d. hvort Danny eigi kærustu. Hann og Emma eru t.a.m. BARA VINIR. Munið að skilafrestur rennur út 26. nóvember.
Sett inn 17. nóv. 2003

Hvað finnst fólki um „trailerinn“?
Aðdáendur hafa verið duglegir að segja álit sitt á nýja bútnum úr kvikmyndinni um Fangann frá Azkaban. DanRadcliffe.com bendir á nokkra staði þar sem þú getur séð álit annarra:
- KSAT.com, Texas, Bandaríkjunum
- The Age, Ástralíu
- Film Force - On the Set (á tökustað)
- Fréttir: Telegraph.co.uk
- IndyStar.com
- Hollywood.com
- BBC News, Bretlandi
Sett inn 17. nóv. 2003

E! - tengillinn virkar ekki ...
Þakkir til „aðdáanda“ sem lét mig vita að „E! News“ tengillinnn hér fyrir neðan virkar ekki. Ég fór á DanRadcliffe.com síðuna til að vita hvað væri að. Það kom í ljós að tvær milljónir manns komu inn á síðuna sama dag og þetta kom í loftið og hún hreinlega sprakk! Vonandi kemst þetta í lag. Þangað til getið þið farið inn á síðuna og flett niður fréttagluggann þar til þið sjáið:
- E! News Live Screen Captures
- Extra! Screen Captures
Smellið á annað hvort (á DanRadcliffe.com) og þá getið þið séð kyrrmyndir úr þættinum. Vonandi kemur sjálfur þátturinn aftur í loftið fljótlega.
Sett inn 17. nóv. 2003

250 milljón bækur seldar
Harry Potter bækurnar hafa slegið öll met að sögn bresku fréttastofunnar BBC og hafa nú þegar selst 250 milljón eintök. Christopher Little, umboðsmaður Rowling, staðfesti þetta á mánudaginn og tilkynnti að Rowling væri byrjuð á sjöttu bókinni. Hann vildi þó ekki gefa upp neina dagsetningu fyrir útgáfu hennar.

Bækurnar hafa verið til sölu í yfir 200 löndum og hafa verið þýddar á 60 tungumál, meira að segja forngrísku. Fimmta og nýjasta bókin, Harry Potter og Fönixreglan, seldist í 1,78 milljón eintökum á fyrsta degi í Bretlandi. Að sögn Sunday Times var Rowling með 125 milljónir GBP á síðasta ári (15 milljarða ISK) en það þýðir t.d. að hún hafi fengið 49 þúsund íslenskar krónur fyrir hvert orð í fimmtu bókinni.
Sett inn 17. nóv. 2003

Verður bók 6 styttri?
Vefsíðan Wizardnews segir að frést hafi eftir áreiðanlegum heimildum að J.K. Rowling hafi sagt opinberlega: „Harry hlýtur lítils háttar en varanleg meiðsl í þessari bók“ („Harry sustains a minimal but lasting injury in this book“). Einnig er sagt að bókin verði aðeins styttri en Eldbikarinn og fyrsta uppkastið verði tilbúið í janúar.
Sett inn 17. nóv. 2003

Kærar þakkir til Köttu ...
Á morgun (þriðjudaginn 18. nóv.) mun birtast ritdómur um HP-5 eftir mig í Bókablaði Moggans. Mig langar að þakka Köttu Birgis í Kópavoginum innilega fyrir hjálpina sem hún veitti mér í gær í sambandi við ritdóminn. Takk, Katta!
Sett inn 17. nóv. 2003

Hvernig verða vitsugurnar í HP-3 kvikmyndinni?
Umsjónarmaður vefsíðunnar HP4U hefur fengið að heimsækja tökustað HP-3 mörgum sinnum og var nýlega með umfjöllun um vitsugurnar sem ég þýddi lauslega:

„Svo margir hafa verið að spyrja okkur um vitsugurnar. Okkur tókst ekki að sjá neina myndatöku þar sem þær komu fyrir - en við fengum að sjá og snerta búningana sem leikararnir voru í þegar þessar senur voru teknar upp. Eins og í bókunum eru skepnurnar um 3 metra háar með svarta hettu og búningarnir voru nákvæmlega eins og þeim hefur verið lýst.

Við sáum hins vegar ekki sjálfar vitsugurnar, en inni í „skepnusafninu“ sáum við eina hangandi uppi á vegg. Hún var næstum eins og manneskja efst á búknum en neðri hlutinn líktist helst krókódíl, hreistraður, og endar í oddhvössum hala. Þarna var hendi af vitsugu sem virtist óhugnanlega raunveruleg.

Við fengum líka að sjá nokkrar senur úr seinni hluta myndarinnar, sem ég er viss um að þið (eins og við) verðið forviða yfir. Í myndinni fljúga vitsugurnar nefnilega. Hverjum datt það í hug? Við horfðum á senuna í Quidditch-leiknum, þar sem Harry er ekki alveg búinn að ná tökum á Patronus-álögunum. Þetta var um 5 mínútna bútur þar sem Harry er yfir leikvellinum og horfir niður í gegnum skýin og rigninguna fyrir neðan hann. Honum til skelfingar sér hann vitsugur í hundraðatali (í bókinni). En í myndinni elta tugir af vitsugum hann í gegnum skýin, hátt fyrir ofan leikvöllinn. Þar sem ég er mikill aðdáandi J.K. Rowling finnst mér þessi breyting slæm, það ætti ekki að bæta við aukahlutum sem eru ekki í bókinni.“

Þetta var orðrétt af HP4U, þýðing: Anna Heiða Pálsdóttir.
Sett inn 16. nóv. 2003

Nýjustu uppfærslur
Undanfarna daga hef ég verið að laga viðtölin við J.K. Rowling en ég hef þýtt um 10 viðtöl. Nú er auðveldara að finna þau. Ég uppfærði líka gestabókina og Tagboard, svo og íslensku tenglana (Tinna, þú ert komin inn).
Sett inn 16. nóv. 2003

Emma Thompson sem Trelawney
Hér hefur áður verið sagt frá því að breska leikkonan Emma Thompson leikur Trelawney. Síðan The Leaky Cauldron er búin að fá mynd af Emmu í þessu hlutverki.
Sett inn 16. nóv. 2003

Þetta verður þú að sjá
Í fyrradag var sérstakur „E! News Live" þáttur í sjónvarpinu á Englandi. Einn af aðdáendum HP tók þáttinn upp á myndband og er búinn að setja hann á DanRadcliffe.com. Þetta er frábært, viðtal við aðalleikarana og allt. Aðstandendur síðunnar settu þetta þarna fyrir okkur út um allan heim sem gátu ekki séð þáttinn.
- Smelltu hér til að sjá „E! News Live“ í Windows Media Player
- Smelltu hér til að sjá „E! News Live“ í Real Media Player
Sett inn 15. nóv. 2003

Tom Felton í sjónvarpsþættinum „This Morning“
Þáttur sem var sýndur í dag fjallaði m.a. um Tom Felton og hvað hann hefur stækkað ört undanfarið. Hann er orðinn hærri en Jason Isaacs og margir hinna leikaranna. Í þættinum kom líka fram að nú fær Tom fleiri aðdáendabréf en Daníel, Rupert og Emma.
Sett inn 15. nóv. 2003

Svolítið „scary“ Síríus
WarnerBros opinbera HP-síðan er búin að setja upp sérstaka Fangann-frá-Azkaban síðu með sniðugum hreyfimyndum af Síríusi Black. Þú getur skráð hvar þú hefur séð Síríus. Þess virði að reyna (mér finnst hann svolítið hryllilegur!).
Sett inn 15. nóv. 2003

Nýtt, nýtt, nýjast!
Í dag er merkilegur dagur vegna þess að þið getið nú séð kynningarmyndband um Harry Potter og fangann frá Azkaban. Farið inn á þessa aðalsíðu og veljið hvað þið viljið sjá. Athugið að HI-RES þýðir mikil upplausn og mestu gæði - en það eru ekki allar tölvur sem ráða við það, MED-RES milligóð upplausn og LOW-RES lítil upplausn (fyrir tölvur með lítið minni). Það eru alls konar valmyndir eftir því hvort þið eruð með Real Time eða Windows Media Player eða eitthvað annað í tölvunni ykkar. Prófið bara allt saman.
Sett inn 13. nóv. 2003

Síða um 3. myndina
Ég er byrjuð á síðu um 3. myndina og bæti smám saman við hana í framtíðinni.
Sett inn 13. nóv. 2003

Dan Radcliffe svarar spurningum ykkar
DanRadcliffe.co.uk og DanRadcliffe.com munu að beiðni fjölskyldu Dannys vera með sérstakan jólaglaðning fyrir aðdáendur Dannys. Ert þú með einhverja spurningu sem þig hefur dauðlangað að leggja fyrir Daníel Radcliffe? Þá er þinn tími kominn! Tekið verður á móti spurningum frá deginum í dag til miðnættis þann 26. nóvember. Valdar verða 100 bestu spurningarnar og þær verða sendar til Dan. Spurningarnar og svörin verða sett inn á báðar síðurnar sem sérstök jólagjöf frá Dan til aðdáenda sinna (og ég reyni að þýða efnið sem jólagjöf til ykkar).

Hafðu þessar reglur í huga:

1. Þú verður að senda inn spurninguna á ensku.

2. Spurningin verður að vera kurteisleg og viðeigandi. Allar spurningar sem eru dónalegar eða móðgandi verða hunsaðar.

3. Vinsamlegast spyrjið ekki persónulegra spurninga, t.d. hvort Danny eigi kærustu, hvaða netfang hann hafi, heimilisfang, símanúmer eða slíkt.

Danny hlakkar til að sjá spurningarnar - sendu þína spurningu á þetta netfang. Sennilega færðu ekki svar við tölvupóstinum þínum vegna þess að þúsundir spurninga berast, en allar spurningar sem koma inn verða skoðaðar og athugaðar. Mundu að segja nafnið þitt og að þú sért frá ÍSLANDI. Ég vona að einhvert ykkar verði valið!
Sett inn 13. nóv. 2003

Gaman í Garðabæ
Þennan ágæta fimmtudag byrjaði ég á því að fara í Garðaskóla í Garðabæ og spjalla við nokkra nemendur sem eru á sérstöku 3ja daga Harry Potter námskeiði. Það var frábært að tala við þau og ég er yfir mig hrifin af því hvað sum þeirra eru góð í forritun og tölvumálum. Takk fyrir skemmtunina!
Sett inn 13. nóv. 2003

Enn fleiri myndir
Nokkrar nýjar myndir úr kvikmyndinni HP og fanginn frá Azkaban. Hér geturðu t.d. séð:
Plakatið sem lýsir eftir Síríusi Black.
Dumbledore að bjóða nýja nemendur velkomna.
Gönguferð hjá Hogwartskóla.
Höndin á vitsugu.
Nýjasta útgáfa af Snape þar sem hann er að verja Hermione, Rupert og Harry gegn varúlfi (sem er, eins og lesendur bókarinnar vita, Lupin professor).
Að lokum er hér Marge frænka eins og útblásin blaðra.
Sett inn 11. nóv. 2003

Síríus Black: tattóveraður
Leikstjórinn Alfonso Cuares lét sér detta í hug að gera Síríus Black
svolítið "krimmalegan" með því að tattóvera hann í bak og fyrir. Ef þig
langar að sjá mynd af leikaranum Gary Oldman með dökkt sítt hár í gerfi
Síríusar, smelltu hér (hann er lengst t.h.)
Sett inn 11. nóv. 2003

HP-3 kvikmynd: tvö stykki myndaalbúm
Vefsíða sem kallast DIGICASEY.COM er með tvö myndaalbúm með myndum af tökum þriðju kvikmyndarinnar um Harry Potter. Annað albúmið inniheldur myndir sem eru teknar á bak við tjöldin við myndatökurnar. Hitt safnið er með alls konar myndum, t.d. af Danny Radcliffe, húsum, plakötum, o.m.fl.
Sett inn 11. nóv. 2003

Fékk aukahlutverk í myndinni
Strákur sem heitir Harrison, 13 ára, er á lista hjá umboðsfyrirtæki leikara
og honum bauðst aukahlutverk í Azkaban-myndinni. Hann fékk lítið að segja en sést í nokkrum senum. Og hann sagði „halló" við Dan Radcliffe. Hann segir frá þessari upplifun á CBBC-vefnum.
Sett inn 5. nóv. 2003

Ertu búin(n) að lesa fimmtu bókina?
Ef þig langar að vita hversu vel þú hefur tekið eftir, þá geturðu prófað
þekkingu þína á CBBC sem er með nokkra spurningalista úr bókinni. Gangi þér vel!
Sett inn 5. nóv. 2003

Viltu fá aukahlutverk í næstu mynd?
Ef þig dauðlangar að fá aukahlutverk í næstu mynd skaltu smella á nýja síðu sem ég var að setja upp og kallast „viltu leika?" Þú getur smellt hér eða bara skoðað dálkinn vinstra megin og fundið síðuna undir KVIKMYNDIR.
Sett inn 5. nóv. 2003

Skyggnst á bak við tjöldin
Ertu forvitin að sjá hvað er að gerast við tökur þriðju myndarinnar, Harry Potter og fangans frá Azkaban? Síða sem sérhæfir sig í fréttum af myndinni heitir HPANA og hefur sett upp hágæða myndir sem teknar eru á bak við tjöldin. Þú velur bara senuna sem þú vilt sjá, t.d. Rupert Grint að ganga í burtu frá hjólhýsinu sínu. . Og svo geturðu séð enn fleiri myndir frá tökustað á Dorkgirl.com. Sjáðu Hagrid í fullum herklæðum fara inn í nútíma Benzinn sinn.
Sett inn 4. nóv. 2003

Flott afmælisgjöf
Á síðu sem kallast Potterish.com geturðu séð mynd af verkfærasetti fyrir galdrakústa sem er afmælisjöf frá Hermione til Harrys í kvikmyndinni Harry Potter og fanginn frá Azkaban.
Sett inn 4. nóv. 2003

Uppfærð afmælisdagabók
Þið hafið verið dugleg að senda mér afmælisdagana ykkar. Ég er að plægja í gegnum uppsafnaðan tölvupóst og smám saman setja inn fleiri tengla á tenglasíðuna og fleiri afmælisdaga í afmælisdagabókina. Ef þú hefur sent mér tengil eða afmælisdag, eða mynd af þér, er þetta allt að koma.
Sett inn 4. nóv. 2003

Hvað er að gerast við myndatökurnar?
Einn góðvinur Alfonso Cuaron, leikstjóra þriðju myndarinnar, fór að heimsækja vin sinn á tökustað í Leavesden, rétt fyrir utan London. Hann lýsir heimsókn sinni og því sem fyrir augu bar á fréttasíðunni MidDay.com. Honum kom t.d. á óvart að sjá að aðalbygging stúdíósins er í stóru skýli sem var notað til að smíða flugvélar í seinni heimstyrjöldinni. Svo er til heil síða um þriðju myndina á Zanzaro.com.
Sett inn 4. nóv. 2003

Harry Potter ferðalag . . . betra en Mallorca?
Ef þú hefur unnið í lottóinu, eða átt bara svolítinn pening, er ég með hugmynd um sumarfrí fyrir þig næsta sumar. Þú ferð með CHRIS RANKIN (sem leikur Percy Weasley) á ferðalag um England 1-6. júní 2004 þegar nýja kvikmyndin, Harry Potter og fanginn frá Azkaban, verður kynnt. Lestu meira um þetta á HPFantrips.com. Þú færð að sitja í Hogwartlestinni og heimsækja tökustaði. Þetta kostar litlar 100 þús. fyrir unglinga og svona 130 þús. fyrir fullorðna. Innifalið er ferðir, gisting, máltíðir og alls konar skemmtun.
Sett inn 3. nóv. 2003

Aðdáendur Daníels Radcliffe - súkkulaði handa ykkur!
Vefsíður um Dan Radcliffe voru að skjóta í loftið æðislegri svart-hvítri mynd af súkkulaðinu. Smelltu hérna til að sjá myndina á DanRadcliffe.com. Hrikalega er hann sætur ...
Sett inn 3. nóv. 2003

Emma Thompson sem Trelawney prófessor
Blað sem heitir The Herald-Sun í Ástralíu var með smá-frétt þann 4. október um að Emma Thompson hafi fengið hlutverk sem Trelawney prófessor í þriðju myndinni. Í greininni eru nokkrir punktar um aðra leikara. Tom Felton sagði m.a.: „Ég elska bílana mína. Ég á svartan BMW 316 Estate sem ég nota sem æfingabíl á meðan ég er 16 ára og ég er að pæla í að fá mér sports coupé með 1,8 l vél sem fyrsta alvöru bílinn." Blaðamaður talaði líka við Danny Radcliffe (14 ára) og spurði um uppáhalds-hljómsveitirnar hans. Hann nefndi: Jane's Addiction, the Libertines, Rage Against the Machine og the Darkness. Rupert Grint, (15 ára) sem leikur Ron Weasley, segist vera mikill pool-spilari - hann er með borð í búningsherberginu sínu - og er nýfarinn að leika golf. Emma Watson (Hermione Granger) er hrifin af dansi: "Á meðan ég er hérna fer ég í danstíma, nútíma, street, body popping, break dancing og allt það. Heima hangi ég bara með vinum mínum." Núna er Emma 13 ára og stóránægð með að vera ekki lengur minnst af þremenningunum í aðalhlutverkunum. „Eftir öll þessi ár sem ég hef alltaf verið minnst, þarf Daníel að viðurkenna að ég er hærri en hann," sagði hún. "Það munar hálfum millimetra," skaut Daníel inn í.
Sett inn 3. nóv. 2003 - tekið af The Leaky Cauldron

Forsetafrúin Laura Bush er hrifin af Potter
Eiginkona George Bush Bandaríkjaforseta, Laura Bush, sem áður var skólabókavörður, var á ferð í Moskvu í októberbyrjun og heimsótti m.a. bókasýningu, skv. frétt af Ananova. Hún lýsti því yfir í samtali við eiginkonu Pútín Rússlandsforseta að sér fyndist gaman að lesa spennubækur. Sl. sumar varð hún hins vegar ástfangin af Harry Potter bókunum. „Ég las bækurnar heima í Texas en mér fannst ég vera óralangt í burtu, í öðrum heimi, falin í huliðsskikkjunni minni, og ég væri að blanda töfradrykki með Harry," sagði hún. „Virkilega góðar bækur láta manni finnast eins og maður sé sjálfur inni í sögunni."
Sett inn 3. nóv. 2003 - tekið af The Leaky Cauldron

Næsta bók verður umhverfisvæn
Fréttasíðan ANANOVA segir að JK Rowling fari fram á að næsta bók hennar verði prentuð á umhverfisvænan pappír. Bækurnar um Harry Potter hafa þegar nýtt pappír úr um 6,5 milljón trjáa. Fleiri höfundar, m.a. Philip Pullman, hafa sýnt stuðning sinn við hreina náttúru með því að krefjast þess að bækur þeirra verði prentaðar á endurunninn pappír. Kanadíska útgáfan af Harry Potter og Fönixreglunni var prentuð án þess að nokkurt tré væri fellt og bjargaði þar með um 40.000 trjám.
Sett inn 3. nóv. 2003

Næstu Harry Potter titlar „upplýstir"
Titlarnir á síðustu tveimur Harry Potter bókunum hafa komið fram skv.
fréttum ANANOVA. Skv. frétt blaðsins The Sun gætu titlarnir á bók 6 og 7 verið Harry Potter And The Mudblood Revolt (Harry Potter og uppreisn kynblendinganna.. hvernig þýðir Helga "mudblood"????) og „Harry Potter And The Quest Of The Centaur" eða Harry Potter og leiðangur kentársins. Báðir titlarnir hafa verið skráðir sem vörumerki hjá fyrirtæki sem kallast Seabottom Productions en það fyrirtæki er í sama húsi og lögmannastofan Field, Fisher, Waterhouse. Sú lögmannastofa starfar fyrir Warner Brothers, sem hafa gert kvikmyndir eftir fyrri bókunum. Margir HP-aðdáendur hafa lýst því yfir að þetta hljóti að vera gert til að gabba fólk vegna þess að titlar Rowling eru „meira cool.“
Sett inn 3. nóv. 2003

Leikstjóri Fjögurra brúðkaupa og jarðarfarar
Upplýsingasíðan ANANOVA segir að breski snillingurinn sem leikstýrði „Four Weddings and A Funeral“ muni leikstýra fjórðu HP-myndinni. Hinn 61 árs gamli Mike Newell verður þá fyrsti Bretinn sem leikstýrir galdradrengnum þegar byrjað verður að mynda Harry Potter og eldbikarinn í apríl 2004. Hann hefur nýlokið við að leikstýra Brosi Mónu Lísu (Mona Lisa Smile) með Juliu Roberts í aðalhlutverki. Newell segist vera spenntur að taka við hlutverkinu. Bandaríski leiksjtórinn Chris Columbus leikstýrði fyrstu tveimur myndunum og mexíkaninn Alfonso Cuaron leikstýrir myndinni um Harry Potter og fangann frá Azkaban, sem er að verða tilbúin.
Sett inn 3. nóv. 2003

Hugmynd fyrir leikfimikennara
Justin vanGelderh, leikfimikennari í skóla sem kallast Horace W. Porter School, er einn af þeim leikfimikennurum í Bandaríkjunum sem hafa gert Quidditch að hluta íþróttakennslunnar. Í bókunum fer leikurinn fram um 15 m fyrir ofan jörðu en það er ekki auðvelt í framkvæmd í leikfimisalnum. Justin kennir mugga-útgáfuna af þessum leik. Justin notar 2 húla-hringi sem klemmdir eru á milli tveggja dýna sitt hvoru megin í leikfimisalnum. Þriðju-bekkingar með svampkylfur verja markið en boltarnir geta dunið á því. Justin segir að þessi leikur hafi aukið áhuga krakkanna á íþróttum.
Sett inn 3. nóv. 2003- tekið af vefnum Boston.com.

Lára fékk fyrstu bókina
Það var skemmtilegt að sjá í sjónvarpsfréttunum í gær hversu mikið líf og fjör var í bókabúðum vegna sölunnar á Harry Potter og Fönixreglunni - starfsfólkið uppáklætt og bauð upp á galdradrykki. Skv. Fréttablaðinu í dag kræktu Lára Þórðardóttir, Nanna Snorradóttir og Ásta Þórðardóttir sér í fyrstu eintökin af HP-5. Vonandi hafið þið mörg nælt ykkur í bók og annars er stutt til jóla ...
Sett inn 2. nóv. 2003

Íslandsbanki „rænir“ efni
Rosalega margir krakkar hafa skrifað mér til að fá að nota efni af síðunni og allir þessir aðilar hafa fengið leyfi hjá mér, enda hefur hver þeirra vísað til mín og sagt hvaðan efnið sé tekið. Svo var ég að kíkja á Harry Potter vef Íslandsbanka og sé þar orðrétt tekið af síðunni minni fullt af efni um bækurnar og um Rowling. Minn vefur er ekki nefndur, og ekki einu sini vísað í hann í tenglasafninu. Hrikalega varð ég reið! Ég púa á svona vinnubrögð. Og þetta er viðskiptabankinn minn. Hmmm ... tekið til endurskoðunar. Hvað myndu þeir gera ef ég rændi bankann þeirra? Senda lögguna á mig. Nú er ég búin að skrifa þeim skammarbréf, sjáum hvað þeir segja.
Sett inn 2. nóv. 2003

HP-5 á íslensku kom út í dag
Loksins kom að því! Klukkan 11:11 í morgun hófu íslenskar bókabúðir að selja nýjustu Harry Potter bókina á íslensku. Ég er að leita að fréttum um söluna og set þær upp við fyrsta tækifæri. Á vefsíðu forlagsins Bjarts segir: „Ísland er meðal fyrstu landa í Evrópu til að gefa út þýðingu af þessu verki en Danir riðu á vaðið með danskri þýðingu um miðjan október. Þýsk útgáfa er væntanlega snemma í nóvember. Þýðendur bókarinnar hér á landi eru Helga Haraldsdóttir og Jón Hallur Stefánsson. Í íslenskri gerð er bókin 746 síður.“ Góða skemmtun, allir!
Sett inn 1. nóv. 2003

250 þátttakendur vinna HP-5
Mjólkursamsalan, uppáhaldsfyrirtækið mitt, er búin að setja í gang Jólaleik Klóa. Í verðlaun eru m.a. 5 stk. N-GAGE farleikjatölvur, 250 eintök af Harry Potter og Fönixreglunni og 250 bíómiðar á sýningu að eigin vali í Smárabíói. Á síðu MS um leikinn segir: Klói er svo sannarlega kominn í jólaskapið og þeysist um snjómiklar brattar brekkur í leit að ævintýrum. Hann langar að gleðja hressa krakka sem drekka Kókómjólk. Með hverri sexu af Kókómjólk fylgir miði með lukkunúmeri. Hér að ofan er reitur þar sem þú slærð inn lukkunúmerið þitt til að sjá hvort heppnin er með þér." Þá er bara að fá sér Kókómjólk og freista gæfunnar.
Sett inn 1. nóv. 2003

Chris Rankin svarar spurningum á BBC
Hinn rauðhærði Chris Rankin, sem var að ljúka leik sínum sem Percy Weasley í Fanganum frá Azkaban, svaraði í gærkvöldi spurningum sem sendar voru inn á BBC í gegnum Netið. BBC er búið að setja spurningarnar og svörin á vefsíðuna sína.
Sett inn 1. nóv. 2003 - tekið af Mugglenet

Stutt í „trailer“ af Azkaban-myndinni
Kynningarbútur („trailer“) af fjórðu HP-myndinni verður 1 mínúta og 46 sekúndur. Hann verður sýndur frá 14. nóvember með nýju LOONY TUNES kvikmyndinni. Auk þess bjóða 2 HP-síður, Counting Down og Rupert Grint Net upp á lýsingu á því sem verður í kynningarmyndinni.
Sett inn 1. nóv. 2003 - tekið af Mugglenet

HOGWARTS-höfuðverkur
Allra áköfustu lesendur Harry Potter-bókanna gætu fengið það sem kallað hefur verið Hogwarts-höfuðverkurinn. Barnalæknirinn Howard J. Bennett upplýsir að hann hafi greint tilfelli af þessum einstæða sjúkdómi hjá þremur börnum sem öll viðurkenndu að hafa lesið Harry Potter og Fönixregluna í margar klukkustundir.
Sett inn 1. nóv. 2003 - tekið af Mugglenet

Þrjár kyrrmyndir úr þriðju kvikmyndinni
Ef þið eruð að bíða spennt eftir þriðju myndinni getið þið kíkt á smá-forskot og séð þrjár kyrrmyndir. Farið á Mugglenet til að sjá þær.
Sett inn 1. nóv. 2003

Bréf frá föður Daníels Radcliffe
Síða sem kallast DanRadcliffe.co.uk hefur staðið sig vel í að flytja heiðarlegar fréttir af kappanum. Nýlega fékk umsjónarmaður síðunnar bréf frá föður Daníels. Ef þú ferð á „update-síðuna“ og flettir niður að 27. október, sérðu árituðu myndina sem fylgdi með bréfinu. Best að standa sig vel, kannski fæ ég bréf frá mömmu Daníels ...
Sett inn 1. nóv. 2003

Daníel Radcliffe leikur í fjórðu myndinni
Síða BBC er með stutta frétt um að Daníel Radcliffe muni pottþétt leika í Harry Potter og eldbikarnum, mynd nr. 4. Þar er líka minnst á endurkomu Matthew Lewis.
Sett inn 1. nóv. 2003

Nokkur forskot á þriðju myndina
Ef þig langar að skyggnast á bak við tjöldin við myndatöku þriðju myndarinnar, um Fangann frá Azkaban, farðu á HPANA-síðuna og smelltu á myndirnar til að sjá þær betur.
Sett inn 1. nóv. 2003

Ein voða heppin
Net-tímarit sem heitir The Times of Malta flytur fréttir af 13 ára gamalli stelpu, Sarah Harrison, sem vann aukahlutverk í myndinni um Harry Potter og fangann frá Azkaban. Sarah tekur þátt í athöfninni þegar nemendur eru valdir í hús í upphafi skólaársins í Hogwartskóla. Hún er upprennandi söngkona, tekur þátt í Eurovision fyrir yngri þátttakendur, og er MIKILL Harry Potter aðdáandi.
Sett inn 1. nóv. 2003