Myndin var tekin í bókabúð í Edinborg rétt eftir miðnætti í nótt.
 

Föstud. 20. júní 2003 - Í BIÐRÖÐINNI
Fólk leggur mikið á sig til að vera FYRST til að næla í nýju Fönixregluna. Halla, Inga og félagar mættu á hádegi til að bíða í HÁLFAN SÓLARHRING í köldu júníveðrinu eftir nýjustu ævintýrum Harry Potter. Þau fengu þó pizzu og heita og kalda drykki til að stytta sér stundir og vöktu óskipta athygli vegfarenda, innlendra sem erlendra. Ég fór í dag og spjallaði við þau sem voru fyrst í röðinni - gaman að hitta þetta hressa fólk. Ég tók líka nokkrar myndir. SMELLTU HÉR TIL AÐ SJÁ ÞÆR!

Til hamingju með daginn, allir!

Laugard. 21. júní 2003 - OPIÐ EFTIR MIÐNÆTTI
Bókabúðin Penninn-Eymundsson í Austurstræti mun opna kl. 00.01 á föstudagskvöldið, það er EINA MÍNÚTU EFTIR MIÐNÆTTI til að selja HP5 á ensku. Opið verður til klukkan 2:00 eða meðan birgðir endast. Ef ég spái rétt (sem gerist nú stundum) þá verða birgðir búnar kl. 00:54. Sjáum til .... ókabúð Máls og menningar á Laugavegi 18 verður opin af þessu tilefni og mun selja fyrsta eintakið af bókinni „þegar ein mínúta er gengin í eitt,“ á sömu mínútu og salan hefst annars staðar í heiminum. Þeir fyrstu sem beðið hafa lengst í röðinni fá bókina að gjöf. Allir sem mæta í sérstökum búningi fá glaðning og að sjálfsögðu fá allir galdradrykk. Einnig verður boðið upp á ýmis skemmtiatriði á meðan beðið er í röðinni. Víkingahetjur munu halda uppi lögum og reglu í röðinni.

Fimmtud. 19. júní 2003 - HULK EÐA HARRY?

Bandaríska blaðið NEWSDAY birti í dag frétt sem Charles Enloe, Wil Cruz and Cynthia Needham skrifuðu um nútíma-baráttu Davíðs og Golíats. Bæði Harry Potter og Hulk koma fram eftir langa bið á laugardaginn og aðdáendur þeirra verða að velja um hvor sigrar. Aðdáendur raða sér upp til að fagna græna risanum eða galdrastráknum. Harry Potter er að koma fram eftir þriggja ára hlé en Hulk, sem hefur verið vinsæl myndablaða- og sjónvarpspersóna í fjóra áratugi, kemur í fyrsta skipti fram á hvíta tjaldinu.

Fimmtud. 19. júní 2003 - ALLIR Í PARTÍ
Víða um heim verða haldin rosaleg bókapartí til að fagna nýju Harry Potter bókinni. Melissa Anelli, hin 23ja ára vefmeistari The Leaky Cauldron (ein af mínum uppáhalds-fréttasíðum) er búin að bjóða 12 vinum heim til sín á Staten Island. Hún sagði í viðtali við Newsday: „Það sem er sérstakt við Harry Potter er að sjaldan hefur jafnmikið verið gert úr einum hlut en það er sama hvað auglýsingaherferð er mikil, það er ekki hægt að selja eitthvað sem er ekki gott.“ Antonio Peralta, 38 ára byggingaverkamaður, ætlar að fara með 9 ára dóttur sinni, Elísabetu, í miðnæturveislu í bókabúðinni Barnes and Noble. „Hún er brjáluð í þessar bækur,“ segir hann. „Hún las síðustu bók á þremur dögum og er búin að safna vikupeningunum sínum - hún fær um 500 kall á viku - til að kaupa nýju bókina.“

Miðvikud. 18. júní 2003 - MEIRI FRÉTTIR AF BÓKARÁNINU
Þjófurinn sýndi fölsuð skilríki til að komast yfir flutningabílinn með HP-5 bókunum. En það verður gersamlega ómögulegt fyrir hann að selja þessar illa fengnu bækur. Sjá nánar á þessari síðu.

Miðvikud. 18. júní 2003 - PASSIÐ YKKUR Á LÖGBROTUM
Útgefandi HP-bókanna á Englandi hefur hótað öllum lögsókn sem birta ólögleg brot úr 5. bókinni. Passið ykkur að gera það ekki. Mér finnst gott að uppáhalds-síðan mín, The Leaky Cauldron, er búin að taka í burtu allar krækjur á síður sem gera þetta, til að forða sér frá vandræðum. Og eitt frægasta blaðið á Englandi, Financial Times, hefur sagt öllum sem er boðið ólöglegt eintak af bókinni að hringja í lögregluna (þeir gefa upp sérstakt símanúmer). Það er „nebbla“ jafn ólöglegt að kaupa stolinn varning eða nýta hann eins og að stela honum sjálfur. Líka á Íslandi.

Miðvikud. 18. júní 2003 - BROT ÚR 5. BÓKINNI
Lilja og Tobba birtu brot úr 5. bókinni á frábæru síðunni sinni. Ég þýddi þetta brot. Smelltu hér til að lesa það (og smelltu á 5. BÓK). Þetta er enginn „spoiler“ (þ.e. segir þér lítið um hvað gerist og skemmir ekki neitt) - heldur „löglegur“ biti frá Amazon.

Miðvikud. 18. júní 2003 - ROWLING GRÉT
J.K. Rowling segir í viðtali við BBC að það hafi fengið mikið á sig að þurfa að drepa eina af aðalpersónunum í Fönixreglunni. Hún ræddi við BBC fréttamanninn Jeremy Paxman og sagðist hafa grátið þegar þessi persóna dó. Hún segir: "Ég kom grátandi inn í eldhús og Neil (eiginmaður hennar) spurði hvað væri að og ég sagði, 'Æ, ég var að drepa þessa manneskju.'" Hún bætti við að hún hafi ekki einu sinni sagt honum hvaða persóna deyr í nýju Harry Potter bókinni, sem kemur í verslanir á miðnætti á föstudaginn. Rowling vill ekki viðurkenna að hún hafi lent í vandræðum að skrifa þessa bók hún kveðst aldrei hafa sett sér einhvern lokaskilafrest.
Sjáið brot úr viðtalinu hérna (smelltu á neðsta takkann, 2003a).
Viðtalið verður sýnt í heild á bresku rásinni BBC2 á morgun, fimmtudag 19. júní, kl. 19:30 (18:30 að íslenskum tíma). Ertu með gervihnattardisk?

Þriðjud. 17. júní 2003 - LOKSINS!
Gleðilegan þjóðhátíðardag, kæri gestur. Jæja, ég held að það sé kominn tími til að uppfæra eftir langt hlé. Annað væri nú ekki hægt þegar 5. bókin ER AÐ KOMA. Ég hef bara haft mikið að gera: ég hef verið á kafi í Alcoa-vinnu. Og svo var ég að klára þýðinguna á GALLABUXNAKLÚBBNUM, dásamlegri bók sem þið verðið að lesa þegar hún kemur út í haust. Ég er byrjuð á heimasíðu gallabuxnaklúbbsins - kíkið endilega á hana (hún er rétt að byrja). Og ég er líka búin að hressa upp á heimasíðu þríleiksins sem fer að stækka meira. Ég setti inn nokkrar fréttir í dag og set svo inn fleiri á næstunni (ég LOFA!).

Þriðjud. 17. júní 2003 - FLEIRI BÓKUM STOLIÐ
Þið hafið eflaust öll frétt fimmtu af bókinni sem starfsmaður prentsmiðju stal um daginn. Í dag kom frétt á BBC um að nokkur þúsund bókum hafi verið stolið. Þetta voru samtals 7.680 bækur að andvirði um 15 milljónir íslenskra króna en þeim var stolið kl. 22:30 á sunnudaginn nálægt verslunarhúsnæði í Newton-le-Willows, Merseyside (nálægt Liverpool). Þessi verðmæti farmur var í flutningabíl sem var stolið og fannst seinna yfirgefinn og bókarlaus í Salford nærri Manchester. Bækurnar voru á leiðinni í ASDA verslanir (sem eru eins konar Bónusbúðir á Englandi). Maður sem vinnur hjá verslanakeðjunni segir: „Við vorum búin að panta um hálfa milljón eintaka svo við ættum ekki að vera í vandræðum.“ Talsmaður J.K. Rowling sagði við fréttamann Newsround Online: „Við vonum að enginn skemmi spennuna fyrir öllum þeim Harry Potter aðdáendum sem bíða í ofvæni eftir að lesa bókina. Hin eftirsótta Harry Potter og Fönixreglan verður til sölu frá miðnætti á föstudaginn í bókabúðum um allan heim.

Þriðjud. 17. júní 2003 - ROWLING Í BEINNI
Þið vitið eflaust þegar að J.K. Rowling ætlar að tala við 4.000 krakka í Royal Albert Hall í Lundúnum (London) fimmtudaginn 26. júní og atburðurinn verður sýndur í beinni á Netinu. Harry Potter aðdáendur í 34 löndum geta fylgst með hátíðinni. Smelltu á BT-síðuna til að undirbúa þig fyrir útsendinguna. ÞÚ GETUR UNNIÐ MIÐA Á HÁTÍÐINA - þá er bara að redda sér fari til Englands fyrir 26. júní.
1) Byrjaðu alla vega á því að hlaða niður Windows Media Player í tölvuna þína, þá verðurðu tilbúinn fyrir útsendinguna.
2) Ég set inn nánari leiðbeiningar um helgina.
Rowling mun lesa upp úr Harry Potter og Fönixreglunni og svo svarar hún spurningum sem aðdáendur hennar víðs vegar um heiminn hafa lagt fyrir hana. Þetta verður í eina skiptið sem hún kemur fram opinberlega til að tala um nýju bókina.

Í þessu húsi mun Rowling hitta 4.000 krakka 26. júní

Þriðjud. 17. júní 2003 - ÖLL MET SLEGIN
Harry Potter og fyrirmæli Fönixins sem kemur út þann 21. júní, hefur þegar slegið öll met sem söluhæsta bókin í forsölu. Aðdáendur eru nú búnir að bíða í þrjú ár eftir þessari fimmtu bók í röðinni. Fyrstu fjórar bækurnar hafa selst í meira en 200 milljón eintökum á 55 tungumálum í 200 löndum.

Þriðjud. 17. júní 2003 - RANGUR BÓKARTITILL?
Vefmeistari þessarar síðu (Anna Heiða) var búinn að sjá fyrir ári síðan að fimmta bókin ætti að heita Harry Potter and the Order of the Phoenix. Þetta gæti þýtt tvennt: Harry Potter og fönixreglan (eins og frímúrarareglan, til dæmis) eða Harry Potter og fyrirmæli Fönixins. Ég valdi fyrri þýðinguna og allir, meira að segja blöðin, hafa notað þá þýðingu. Hins vegar getur vel verið að titillinn sé HARRY POTTER OG FYRIRMÆLI FÖNIXINS ... það kemur í ljós eftir að bókin er lesin. Látið mig vita, þið sem lesið hana!