Flest orð og nöfn í Harry Potter bókunum eiga sér einhverja dýpri merkingu á ensku tungumáli. Hér eru nokkur dæmi:

DUMBLEDORE
skólastjóri Hogwartskóla ber nafn sem er fornt heiti yfir býflugu. Hann er líka með nefið ofan í öllu, virðist vita allt sem er að gerast - og samt sést hann aldrei nálægt því!

DRACO MALFOY (borið fram DREI-kó MAL-foj)
er samansett af fornafni sem minnir á dreka og eftirnafni sem útleggst á frönsku sem slæm trú. LUCIUS MALFOY (borið fram LÚ-shuss MAL-foj) er faðir Draco Malfoy.

VOLDEMORT (ath. að t-ið er ekki borið fram)
erkióvinur Harry Potter ber einnig franskt nafn, sem merkir nokkurn veginn að hann svindli á dauðanum - enda er hann að reyna að ná í viskusteininn sem tryggir honum eilíft líf.

ARGUS FILCH
er vaktmaðurinn í Hogwartskóla sem er með augun á öllu sem krakkarnir aðhafast. Nafn hans minnir á Argus úr grískri goðafræði, sem var með augu um allan líkamann.

SKÓLABÆKURNAR
sem Harry les heita ýmsum undarlegum nöfnum og nafn höfundar þeirra vísar oft til aðaláhugamálsins. Ein af bókunum heitir Leiðarvísir í ummyndun fyrir byrjendur og er eftir Emeric Switch (sem þýðir að skipta yfir í eitthvað), og önnur heitir Töfradrykkir og elexírar eftir Arsenius Jigger (minnir á arseník, sem er eiturefni og jigger er lítið staup eða hristari).

MUGGAR
heita þeir sem ekki tilheyra galdraheiminum (á ensku „Muggles“). Orðið er dregið af forníslenska orðinu „mugga“, sem þýðir dimmviðri, þoka, drungi eða deyfð. Það merkir þá fólk sem er sljótt - eða eins og sumir segja: „þokuhausar".

RON WEASLEY
er besti vinur Harrys. Ron kemur úr stórri fjölskyldu, og er galdramaður í báðar ættir. Fjölskylda hans er fátæk, og hann hefur ekki efni á að kaupa sér uglu, svo hann fær sér feitu, gráu rottuna Scabber sem gæludýr. Foreldrar hans eru Arthur og Molly Weasley. Arthur vinnur við að líta eftir því hvort fólk „stelist“ til að nota galdra í Muggaheiminum.

SYSTKINI RONS:
BILL er elsti bróðir Rons, en hann vinnur í Egyptalandi.
CHARLIE vinnur með dreka í Rúmeníu.
FRED og GEORGE eru tvíburar.
PERCY er nemandi í Hogwartskóla og er umsjónarmaður.
Ron er næstyngstur.
GINNY er yngsta barnið, eina stelpan, og er ári yngri en Harry og Ron. Hún byrjar í Hogwartskóla í bók #2 og fellur fyrir Harry.

HERMIONE GRANGER (framb. HER-MÆ-ÓN-Í)
er vinkona Harrys. Hermione er ekki „hreinræktaður“ galdramaður, heldur ber hún einnig Muggablóð í æðum, sem kemur henni í vandræði í annarri bókinni (Harry og leyndarmálaherbergið). Sú staðreynd að Hermione er ofsótt í þeirri bók vegna þess að hún er ekki með „hreint“ blóð í æðum er athugunarverð í umræðu um kynþáttaofsóknir.

UGLAN HEDWIG
er snjóugla, gæludýr Harrys og sendiboði - hún sér um póstþjónustuna fyrir hann. Hagrid gaf Harry Hedwig í afmælisgjöf. Rowling segir að Hedwig sé dýrlinganafn.

LILY OG JAMES POTTER
voru foreldrar Harrys en Voldemort drap þau þegar Harry var ungabarn. Petunia, eiginkona Vernons Dursley, var systir Lily. Þau eiga soninn Dudley, sem er ofdekraður, svo ekki sé meira sagt.

QUIDDITCH
Joanne Rowling fann upp Quidditch-leikinn þegar hún eyddi nótt á litlu hóteli í Manchester, og segir: „Ég vildi finna leik fyrir galdramenn, og mig hafði alltaf langað að sjá leik þar sem fleiri en einn bolti væru í spilinu. . . .Muggaleikurinn sem hann líkist helst er körfubolti en það er sú íþrótt sem ég hef mest gaman af að horfa á." Í Quidditch eru sex mörk, fjórir boltar og tvö sjö manna lið sem eigast við í næstum 20 m hæð yfir jörðu, fljúgandi á kústsköftum. Harry Potter er „leitari“ í Quidditch og skarar fram úr sem slíkur. Hjá honum, eins og mörgum drengjum á þessum aldri, kemst stundum lítið annað fyrir en næsti leikur. Drengurinn er ekkert sérstaklega góður í göldrum en mjög klár í Quidditch!